केज (बीड): यावर्षी मॉन्सूनच्या पावसाचे वेळेत आगमन झाल्याने मृग नक्षत्रात खरिपाच्या पेरण्या उरकल्या. त्यामुळे पिके जोमात आल्याने शेतकऱ्यांत आनंद होता. मात्र मागील काही दिवसांपासून तालुक्यात होत असलेल्या जोरदार संततधार पावसामुळे शेतात सर्वत्र पाणी साचले. उभ्या कोवळ्या पिकांचे नुकसान झाले आहे.

तालुक्यात सुरू असलेल्या जोरदार पावसाने चोहीकडे पाणीच-पाणी झाले आहे. मागील काही दिवसांपासून दररोज जोरदार पाऊस सुरु असल्याने सूर्यदर्शन नाही. शेतात पाणी साचल्याने पिके पाण्यात बुडाली असून त्यांची वाढ खुंटली आहे. बहुतांश शेतकऱ्यांनी खरिपाच्या पीकविमा भरला आहे. मात्र विमा कंपनीच्या नव्याने ठरविण्यात आलेल्या जाचक अटी व नियमांमुळे अनेक शेतकरी नुकसान होऊनही पीकविम्यापासून वंचित राहण्याची शक्यता बळावली आहे. कारण पावसामुळे झालेल्या नुकसानीचे फोटो काढून ते शासनाच्या कृषी विभागाच्या संकेतस्थळावर ऑनलाइन भरण्याची प्रक्रिया सर्वसाधारण शेतकऱ्यांसाठी सोयीची नाही.

त्यामुळे भविष्यातील हा धोका विचारात घेत कृषी, महसूल व पंचायत विभागाच्या संयुक्त पथकाने स्थानिक पातळीवर बांधावर जाऊन पावसामुळे झालेल्या पिकांचे पंचनामे करण्याची मागणी शेतकऱ्यांमधून केली जात आहे.