औरंगाबाद : पेट्रोल, डिझेल आणि गॅसच्या किंमती गगनाला भिडल्याने कॉंग्रेसतर्फे सोमवारी (ता. 10) भारत बंदची हाक देण्यात आली. या बंदचा भाग म्हणून महागाईच्या विरोधात कॉंग्रेसचे प्रदेश प्रवक्‍ते सचिन सावंत यांच्या नेतृत्वात शहरातील विविध पेट्रोल पंपासमोर आंदोलन करण्यात आले. मुकूंदवाडी येथील पेट्रोलपंपावर बैलगाडीवर "कहाँ गए अच्छे दिन', "वाह रे मोदी तेरा खेल, सस्ती दारु महंगा तेल', "इंधन दरवाढ कमी झालीच पाहिजे' अशा घोषणांनी पेट्रोल पंपासमोरचा परिसर दणाणुन गेला.

मुकूंदवाडी पेट्रोल पंपासमोर प्रदेश प्रवक्‍ते सावंत, आमदार सुभाष झांबड, माजी आमदार डॉ. कल्याण काळे, शहराध्यक्ष नामदेवराव पवार यांच्या नेतृत्वात धरणे देउन घोषणाबाजी करण्यात आली. इंधनाचे भाव वाढ झाल्याच्या निषेधार्थ बैलगाडीत उभे राहून या ठिकाणी आंदोलन करण्यात आले.