बदनापूर (जि.जालना) : धारावी (मुंबई) येथील जैन धर्मीय दर्शनार्थ्यांच्या कारला अपघात झाल्याने एक जण ठार झाला आहे. तर चार जण जखमी झाले आहेत. ही घटना सोमवारी (ता. ३०) पहाटे पाच वाजेच्या सुमारास जालना - औरंगाबाद महामार्गावरील दावलवाडी (जिल्हा जालना) शिवारात घडला.

याबाबत जालना येथील किशोर खवडे यांनी दिलेली माहिती अशी की, धारावी (मुंबई) येथील जैन कुटुंबातील सहा ते सात जण बुलढाणा जिल्ह्यातील देऊळगावराजा येथे जैन गुरू कुशाग्रमुनी महाराज यांच्या चतुर्मासाच्या कार्यक्रमासाठी आपल्या आर्टिगा कारने जात होते. सोमवारी (ता. ३०) पहाटे पाच वाजेच्या सुमारास त्यांच्या कारचा अपघात झाला. अर्थात हा अपघात त्यांच्या कारला अज्ञात वाहनाची धडक बसल्याने झाला असावा असा प्राथमिक अंदाज वर्तविण्यात येत आहे. या अपघातात कार चालक हसमुख धनराज जैन (वय ३५) जागेवरच ठार झाले आहेत. तर कार मधील अमृतदेवी जैन, महावीर जैन, महावीर काया यांच्यासह एक महिला व लहान मुलगा (सर्व राहणार मुंबई) किरकोळ जखमी झाले आहेत. जखमींवर प्रारंभी जालना येथील सरकारी व नंतर खासगी रुग्णालयात उपचार करण्यात आले आहे. दरम्यान, अपघातातील मृत हसमुख जैन यांची उत्तरीय तपासणी करण्यात आली असून त्यांचा मृतदेह मुंबईकडे रवाना करण्यात आला आहे.

दरम्यान, या प्रकरणी बदनापूर पोलिस ठाण्यात सोमवारी (ता. ३०) सायंकाळी पाच वाजे पर्यंत गुन्हा दाखल झालेला नाही. मात्र जालना येथील मेडिकल पोलिस चौकीत अकस्मात मृत्यू म्हणून नोंद झाल्याची माहिती बदनापूर पोलिस ठाण्यातील मुख्य जमादार एस. जी. कांदे यांनी दिली.