औरंगाबाद - श्रीरामपूरहून चोरलेल्या दुचाकीवरून साथीदारासोबत महिलांचे दागिने हिसकावल्याचा प्रकार समोर आला. यातील संशयिताला पुंडलिकनगर पोलिसांनी बेड्या ठोकल्या. ही कारवाई छत्रपती महाविद्यालय सिडको एन-तीन भागात सोमवारी (ता. 26) करण्यात आली. 

राहुल ऊर्फ राणा बाजीराव सोळंके (वय 22) असे संशयिताचे नाव आहे. 26 ऑगस्टला उच्च न्यायालय खंडपीठ परिसरात पुंडलिकनगर पोलिस गस्तीवर होते. त्यावेळी एक तरुण दुचाकीवरून संशयास्पदरित्या फिरत असल्याची माहिती त्यांना कळाली. यानंतर पोलिसांनी नजीकच्या महाविद्यालय परिसरात सापळा रचला. त्यानंतर तरुणाला ताब्यात घेतले. चौकशीनंतर त्याचे राहुल नाव असल्याचे समोर आले. त्याने व साथीदार बॉबी ऊर्फ ऋषिकेश झिंझुर्डे याने मिळून 20 ऑगस्टला रात्री आठच्या सुमारास विद्यानगर भागात सविता नारायण कुलकर्णी (वय 62, विद्यानगर, गारखेडा) यांचे 42 हजारांचे मंगळसूत्र हिसकावले, अशी बाब पोलिसांनी सांगितली. राहुल राणा पोलिसांच्या रेकार्डवरील गुन्हेगार असून मुकुंदवाडी, करमाड, एमआयडीसी सिडको पोलिस ठाण्यात त्याच्याविरुद्ध दाखल गुन्ह्यात तो फरारी होता. त्याने आणखी काही दागिने चोरी केल्याचा पोलिसांनी संशय व्यक्त केला. ही कारवाई उपायुक्त डॉ. राहुल खाडे, सहायक आयुक्त रामचंद्र गायकवाड, सहायक निरीक्षक घनशाम सोनवणे, उपनिरीक्षक विकास खटके, रमेश सांगळे, मच्छिंद्र शेळके, बाळाराम चौरे, राजेश येदमळ, नितेश जाधव, प्रवीण मुळे, शिवाजी गायकवाड, दीपक जाधव यांनी केली. 
 
मोबाईलही हिसकावला होता 
संशयित राहुल राणा व आणखी दोघे एकाच दुचाकीने 14 ऑगस्टला केटली गार्डनजवळ आले व त्यांनी मयूरी अभिजित बहिरशेठ यांचे मंगळसूत्र हिसकावण्याचा प्रयत्न केला होता. मंगळसूत्र हाती न लागल्याने तिघांनी मोबाईल हिसकावून पळ काढला होता. यात पुंडलिकनगर पोलिसांनी शुभम गणगे, कुणाल वैष्णव यांना अटक केली होती. परंतु, राहुल पसार होता.