हिंगोली : कोरोना विषाणूच्या भितीने व कच्च्या मालाच्या वाढलेल्या किमतीने पोल्‍ट्री फार्म व्यवसाय धोक्यात आला आहे. सोशल मीडीयावरील अफवांमुळे पोल्ट्री (मांस) खरेदीकडे दुर्लक्ष केले जात आहे. याचाच फटका पोल्ट्री फार्म व्यावसायिकांना बसत आहे.

पोल्‍ट्री व्यावसायिक हे सुशिक्षित बेरोजगार आहेत. मागील दोन वर्षांपासून शेतीला पूरक व्यवसाय म्‍हणून कुकुटपालन हा व्यवसाय करीत आहेत. परंतु, दोन महिन्यांपासून कोरोना व्हायरसच्या अफवेमुळे चिकन व अंडे यांचा खप अचानक कमी झाला आहे. त्‍यामुळे व्यवसायीक अडचणीत सापडले आहेत. त्‍यामुळे व्यवसाय करणाऱ्यांवर कर्जाचा डोंगर उभा राहीला आहे. 

हेही वाचा - पत्‍नी- पत्‍नीच्या भांडणात नऊ वर्षाच्या चिमुकलीचा मृत्‍यू

दोन वर्षांपासून बँकेचे कर्जाचे हप्‍ते थकले

एक किलोची कोंबडी तयार करण्यासाठी ७५ रुपये खर्च येतो. तीन किलो वजनाची कोंबडी तयार करण्यासाठी २१५ रुपये लागतात. मात्र ही कोंबडी फुकट घेण्यास देखील कोणी तयार नाही. त्‍यामुळे नुकसान सहन करावे लागत आहे. संपूर्ण भांडवल संपुष्टात आले असून बँक कर्ज, सोने तारण, सोसायटी, बचतगटाचे घेतलेले कर्ज पूर्णपणे थकले आहे. त्‍यामुळे सर्वच मार्ग बंद झाले आहेत. दोन वर्षापासून तयार खाद्य व कच्चा मालाच्या किमंतीत वाढ झाली आहे. यात मका, सोयाबीन, डिओसी, तांदूळ यांचा समावेश आहे. दोन वर्षांपासून बँकेचे कर्जाचे हप्‍ते थकले आहेत. 

जिल्हाधिकाऱ्यांना निवेदन

दरम्यान, या बाबत आकाश फेगडे, रंगनाथ इंगोले, संदीप कोरडे, गोविंद ढोकणे, दर्शन राऊत, गणेश नागरे, मुक्‍तार कुरेशी, लक्ष्मण जाधव, वर्षा फेगडे, संभाराव मंदाडे, डॉ. किशन वाघमारे, डॉ. प्रल्‍हाद वाघमारे, विठ्ठल कदम, रामकिशन चव्हाण, मनोहर जाधव, करण मोरे, उमराव शेळके आदींनी जिल्हाधिकाऱ्यांना निवेदन दिले आहे. पोल्‍ट्री व्यावसायिकांना अनुदान द्यावे, अशी मागणी या निवेदनात केली आहे. अन्यथा जिल्‍हाधिकारी कार्यालयासह इतर कार्यालयात कोंबड्या सोडण्यात येतील, असा इशाराही देण्यात आला आहे.

कोरोना विषाणू बाबतच्या अफवांकडे दुर्लक्ष करा

कोरोना विषाणू सांसर्गिक आजार असून एका व्यक्तीकडून दुसऱ्या व्यक्तीकडे संक्रमीत होतो. कुक्कुट पक्ष्यांकडून मानवामध्ये हा आजार संक्रमित होत नसल्याबाबत शास्त्रीय संदर्भ आहेत. या बाबत सोशल मीडीयावर पसरत असलेल्या अशास्‍त्रीय अफवांकडे दुर्लक्ष करावे, असे आवाहन जिल्‍हाधिकारी रुचेश जयवंशी यांनी केले आहे.

येथे क्लिक करा - चालक, क्लिनरला मारहाण करून ऐवज लुटला

व्यवसाय राज्याच्या विकासाशी जोडलेला

मांस व मांस उत्पादने ही उकळवून व शिजवून सेवन केल्या जातात. त्या तापमानात कुठलेही विषाणू जिवंत राहू शकत नाहीत. राज्यात कुक्कुटपालन व्यवसाय मोठ्या प्रमाणावर केल्या जात असून या व्यवसायाशी अनेक शेतकऱ्यांचे चरितार्थ व आर्थिक हित जोडलेले आहे. पर्यायाने हा व्यवसाय राज्याच्या विकासाशी जोडलेला आहे. खोट्या अफवांमुळे कुक्कुटपालन व्यवसाय आर्थिक संकटात सापडला असून या व्यवसायाशी निगडीत लोकांचे प्रचंड नुकसान झाले आहे.

नोव्हेल कोरोना विषाणू प्रादुर्भावाशी संबध नाही

काही दिवसांपासून सोशल मीडिया, फेसबुक व व्हॉट्सॲपद्वारे कुक्कुट मांस व अंडी यांच्या आहारातील उपयोगाबाबत विविध अशास्त्रीय अफवा पसरविल्या जात आहेत. कुक्कुट पक्षी व कुक्कुट उत्पादने यांचा नोव्हेल कोरोना विषाणू प्रादुर्भावाशी कोणताही संबंध नसून ते मानवीय आहारामध्ये वापरण्यासाठी पूर्णपणे सुरक्षित आहेत. नागरिकांनी समाज माध्यमांवर पसरत असलेल्या अशास्त्रीय अफवांकडे दुर्लक्ष करावे, याबाबत काही शंका असल्यास पशुसंवर्धन विभागाशी संपर्क करावा, असे आवाहन जिल्हाधिकारी श्री. जयवंशी यांनी केले आहे.