परळी वैजनाथ : राज्यभर झालेल्या मराठा क्रांती मोर्चांनंतर मराठा आरक्षण मागणीचा हुंकार राज्यभर पेटविणाऱ्या परळीत जुलै-ऑगस्ट महिन्यात तब्बल 21 दिवस ठिय्या आंदोलन झाल्यानंतर आता पुन्हा आणखी या मागणीसाठी रविवार (ता. 25) पासून येथील तहसिल कार्यालयासमोर आंदोलन सुरु झाले आहे.

मराठा क्रांती ठोक मोर्चाच्या वतीने यापूर्वी मराठा आरक्षण द्यावे यासह विविध मागण्यांसाठी परळीत यापूर्वी ता. 18 जुलै ते सात ऑगस्ट 21 दिवस ठिय्या आंदोलन झाले. आंदोलनामुळे पुन्हा एकदा राज्यभर या मागणीच्या आंदोलनाचा वनवा पेटला होता. दरम्यान, या आंदोलनात समाजाला शासनाने दिलेली आश्वासने पाळली नाहीत असा आरोप करत रविवार पासून पुन्हा एकदा ठिय्या आंदोलन सुरु झाले आहे.

मराठा समाजाला आरक्षण देताना पुर्वीप्रमाणे दिशाभूल न करता ठोस आणि कायमस्वरूपी टिकणारे आरक्षण द्यावे, कोपर्डी घटनेतील आरोपींला फाशीची शिक्षा द्यावी, अण्णासाहेब पाटील आर्थिक विकास महामंडळाच्या नावांमध्ये मराठा नावाचा उल्लेख करावा, कर्ज वितरणाची प्रक्रिया सुलभ व सुटसुटीत करून बँकांना कर्जवितरण सक्तीचे करावे, मागील आंदोलनात आरक्षण मागणीसाठी शहीद झालेल्या मराठा आंदोलकांच्या कुटुंबीयांना तात्काळ आर्थिक मदत करावी, आरक्षण मागणी आंदोलकांवरील गुन्हे तात्काळ मागे घ्यावेत आदी मागण्या आंदोलकांनी केल्या आहेत.

दरम्यान, आंदोलकांना मंडप टाकण्यास प्रशासनाने परवानगी नाकारल्याने आंदोलकांनी रस्त्यावरच ठिय्या मांडला आहे. आंदोलनाचे निवेदन देणाऱ्यांना प्रशासनाने नोटीसा बजावून आंदोनापासून परावृत्त केले.