जायकवाडी : जायकवाडी ब्रह्मगव्हाण उपसा सिंचन योजनेच्या टप्पा क्रमांक दोनच्या सुरू असलेल्या पंपगृहाची व उदग्रहन कामाची पाहणी शुक्रवारी (ता.17) अधीक्षक अभियंता बबनराव जटाळे यांनी केली. 

ब्रह्मगव्हाण उपसा सिंचन योजना लवकरच मार्गी लागण्याचे संकेत असून या योजनेमुळे पैठण तालुक्‍यातील 55 गावांच्या शेतजमिनीसाठी सिंचनाची व पिण्याच्या पाण्याची समस्या कायमस्वरुपी दूर होऊ शकते. पैठण जायकवाडी प्रकल्पातून खेर्डा प्रकल्पापर्यंत पाइपलाइनद्वारे पाणीपुरवठा करण्यात येणाऱ्या इसारवाडी येथील क्रॉसिंग पाईपलाईनच्या कामाचीही अधीक्षक अभियंता जटाळे यांनी पाहणी केली, तेथील कामकाजाची त्यांनी माहिती घेतली. 

या योजनेच्या कालवा क्रमांक एकचे काम अकरा किलोमीटरपर्यंत झाले असून कालवा क्रमांक दोनचे कामही अंतिम टप्प्यात आहे. यावेळी कार्यकारी अभियंता अनिल निंभोरे, सहायक कार्यकारी अभियंता कृष्णा घुगे, मयुरा जोशी, सोनाई कन्स्ट्रक्‍शनचे कंत्राटदार रमेश अहिरराव, रविराज मराठे, शाखा अभियंता नुसरत बेग, उल्हास चव्हाण, विजय वाघमारे, कैलास सगोरे, राकेश महाले, जयेश त्रिभुवन, भूषण मोरे यांच्यासह अन्य अधिकारी उपस्थित होते. जानेवारी 2018 अखेर खेर्डा प्रकल्पात ब्रह्मगव्हाण उपसा सिंचन योजनेचे पाणी पोहोचविण्याचे नियोजन करण्यात आले असून सद्यस्थितीत या प्रकल्पाचे काम समाधानकारक व प्रगतीपथावर असल्याचे अधीक्षक अभियंता बबनराव जटाळे यांनी सांगितले.