हिंगोली : औंढा नागनाथ तालुक्यातील सिध्देश्वर धरणात पाण्याची आवक वाढल्याने धरण शंभर टक्के भरले असुन धरणातून पाण्याचा विसर्ग केला जात आहे. सलग चौथ्या दिवशीही शनिवारी ता. २५ नऊ वाजता धरणाच्या चौदा दरवाज्या पैकी बारा दरवाजे उघडले असुन पुर्णा नदीपात्रात पाणी सोडण्यात येत असल्याने नदी काठावरील गावाना सतर्कतेचा इशारा देण्यात आला आहे. आज ३०,९०७ क्युसेक पाण्याचा विसर्ग केला जात आहे.

औंढा तालुक्यातील सिध्देश्वर धरण शंभर टक्के भरले असून पाण्याची आवक बघता बुधवार, गुरुवार, शुक्रवार धरणाचे बारा दरवाजे उघडून पुर्णा नदीपात्रात पाण्याचा विसर्ग करण्यात आला. शनिवारी देखील सकाळी नऊ वाजता बारा दरवाजे उघडून पुर्णा नदी पात्रात ३०,९०७ क्युसेक पाण्याचा विसर्ग केला जात आहे.

धरणाचे आज एकुण चौदा दरवाज्या पैकी बारा दरवाजे उघडण्यात आले आहेत. यामध्ये एक,दोन, तीन, चार,सहा, सात, आठ, नऊ, अकरा, बारा, तेरा व चौदा हे दरवाजे उघडून पाण्याचा पुर्णा नदी पात्रता विसर्ग केला जात आहे. दरम्यान मागच्या पाच दिवसापासून पाऊस सुरू आहे. आज सकाळी देखील जिल्ह्यात पाऊस झाला होता. सिध्देश्वर धरणाच्या लाभ क्षेत्रात देखील चांगला पाऊस पडत असल्याने धरणात पाण्याची आवक वाढली आहे.

यामुळे हे धरण शंभर टक्के भरले आहे. पावसाचा जोर वाढण्याची शक्यता हवामान खात्याने वर्तविली असल्याने धरणातून पाण्याचा विसर्ग केला जात आहे. पाण्याची आवक पाहून विसर्ग वाढविणे, कमी करणे बाबत पुढील निर्णय घेण्यात येणार असल्याचे सांगण्यात आले आहे. प्रशासकीय स्तरावरून पुर्णा नदीकाठच्या गावांना सतर्कतेचा इशारा प्रशासनाकडून देण्यात आला आहे.