तेर - शाळेत ये-जा करताना गावातील रोडरोमिओंकडून वारंवार होणाऱ्या छेडछाडीला कंटाळून एका चौदावर्षीय अल्पवयीन मुलीने स्वतःच्या राहत्या घरात पेटवून घेत आत्महत्या केल्याची घटना २८ जून रोजी हिंगळजवाडी (ता. उस्मानाबाद) येथे घडली. याप्रकरणी हिंगळजवाडीतील दोघांविरुद्ध ढोकी पोलिस ठाण्यात गुन्हा दाखल करण्यात आला आहे. 

हिंगळजवाडीतील अल्पवयीन मुलीने सततच्या छेडछाडीला कंटाळून आपली जीवनयात्रा संपवली. २८ जूनला राहत्या घरी तिने स्टोव्हमधील रॉकेल अंगावर ओतून घेत पेटवून घेतले होते. गंभीर भाजल्याने उस्मानाबाद येथील शासकीय रुग्णालयात तिचा उपचारादरम्यान एक जुलैला मृत्यू झाला. पीडित मुलीच्या वडिलांनी ढोकी पोलिस ठाण्यात दिलेल्या फिर्यादीवरून हिंगळजवाडी येथील सोमनाथ सुरेश वाकुरे व बाळू रमाकांत पिंपळे या दोघांविरुद्ध विनयभंग, छेडछाड करून आत्महत्येस प्रवृत्त केल्याप्रकरणी गुन्हा दाखल करण्यात आला आहे. पोलिस निरीक्षक बी. जी. वेव्हळ यांच्या मार्गदर्शनाखाली पोलिस उपनिरीक्षक जाधव तपास करीत आहेत. दरम्यान, तेरमध्ये शाळेत ये-जा करणाऱ्या मुलींच्या छेडछाडीचे प्रकार वाढल्याने महाराष्ट्र संत विद्यालयाच्या मुख्याध्यापकांनी १५ जुलै रोजी रोडरोमिओंचा बंदोबस्त करण्यासाठी पोलिसांकडे तक्रार दिली आहे. याप्रकरणी पोलिस प्रशासन नेमकी कोणती भूमिका घेणार, याकडे पालकांचे लक्ष लागले आहे.