नांदेड - पंजाब, हरियाणा आदी भागातून नांदेडला मुख्य सचखंड गुरुद्वाराच्या दर्शनासाठी आलेल्या जवळपास तीन हजार शीख भाविकांना लॉकडाउनमुळे गेल्या महिन्याभरापासून नांदेडला अडकून रहावे लागले. अखेर केंद्र आणि राज्य सरकारच्या परवानगीने त्यातील पाचशे भाविकांचा जत्था रवाना झाला आहे.

राज्याचे मुख्यमंत्री उद्धव ठाकरे, पंजाबचे मुख्यमंत्री कॅप्टन अमिंदरसिंघ आणि पालकमंत्री अशोक चव्हाण यांच्या प्रयत्नांना यश मिळाले आहे. शीख भाविकांचा जत्था जात असताना मुख्य जत्थेदार संत बाबा कुलवंतसिंघजी, आमदार अमर राजूरकर, आमदार मोहन हंबर्डे आदींची उपस्थिती होती. 

हेही वाचा - Video : सावधान...वजिराबाद चौरस्त्यावर अवतरला यम

दहा खासगी बसद्वारे रवाना
लॉकडाऊनच्या आधी नांदेड येथे पवित्र श्री सचखंड हुजूरसाहेब गुरुद्वाऱ्याच्या दर्शनासाठी आलेले पंजाबमधील अनेक भाविक नांदेड येथे अडकले होते. त्यांना नांदेड येथून त्यांच्या मुळ राज्यामध्ये जाण्याची परवानगी हवी होती. राज्याचे मुख्यमंत्री उध्दव ठाकरे, पंजाबचे मुख्यमंत्री कॅप्टन अमिंदरसिंघ व नांदेडचे पालकमंत्री अशोक चव्हाण यांनी प्रयत्न करुन त्यांना जाण्याची परवानगी मिळवून दिली. त्यानंतर दहा ट्रॅव्हल्समधून पाचशे शीख भाविकांचा जत्था गुरुवारी (ता. २३) पंजाबकडे रवाना झाला.

लॉकडाउनचा कालावधी वाढल्याने अडचण 
पंजाब येथील अनेक शीख बांधव गुरुद्वारा परिसरात अडकले होते. त्यांची राहण्याची व जेवण्याची व्यवस्था श्री सचखंड गुरुद्वारा यांच्यातर्फे करण्यात आली होती. परंतु लॉकडाउनचा कालावधी वाढल्यामुळे शीख भाविकांमध्ये बैचेनी निर्माण झाली होती. त्यांच्या मुळगावी त्यांना जाण्याची परवानगी द्यावी अशी मागणी वारंवार करण्यात येत होती. त्यांच्या या मागणीची दखल घेवून पालकमंत्री अशोक चव्हाण यांनी मंत्रिमंडळाच्या अर्थविषयक सल्लागार उपसमितीच्या बैठकीत शीख भाविकांचा विषय मांडला होता. त्यासोबतच मुख्यमंत्री उध्दव ठाकरे यांच्याकडे भाविकांना पंजाबमध्ये पाठविण्याची विनंती केली होती.

हेही वाचलेच पाहिजे - अरे बापरे...! नांदेडला कोरोना आला कुठून?

दोन्ही राज्याच्या मुख्यमंत्र्यांची चर्चा
मुख्यमंत्री ठाकरे यांनी पंजाबचे मुख्यमंत्री कॅप्टन अमिंदिरसिंघ यांच्याशी संपर्क करुन नांदेड येथे अडकलेल्या भाविकांना पंजाबकडे पाठविण्याची परवानगी दिली. त्यांच्या या परवानगीनुसार हिंगोली येथील खुराणा ट्रॅव्हल्सचे मालक जगदीश खुराणा यांनी ‘ना नफा, ना तोटा’ या तत्वानुसार भाविकांना पंजाबकडे नेण्याची तयारी दाखविली. त्यानुसार गुरुवारी रात्री आठ वाजता गुरुद्वाराचे मुख्य जत्थेदार बाबा कुलवंतसिंघजी यांनी भाविकांसाठी अरदास केली व सर्वांना शिरोपा प्रदान केला. त्यानंतर हा जत्था पंजाबकडे रवाना झाला. हा जत्था रवाना झाल्यानंतर पंजाबचे मुख्यमंत्री कॅप्टन अमिंदरसिंग यांनी पालकमंत्री अशोक चव्हाण यांना फोन करुन त्यांचे आभार मानले. नांदेडमध्ये अडकलेल्या भाविकांना परत आणण्यासाठी काही अडचण आल्यास मदत करण्याची विनंती केली.

शीख भाविक रवाना
यावेळी बाबा कुलवंतसिंघजी, आमदार अमर राजूरकर, आमदार मोहन हंबर्डे, गुरुद्वारा बोर्डाचे सचिव रविंद्रसिंघ बुंगई, सदस्य मनप्रितसिंघ कुंजीवाले, गुरुमितसिंघ महाजन, भगिंदरसिंघ घडीसाज, गुरुचरणसिंघ घडीसाज, गुलाबसिंघ कंधारवाले, देवेंद्रसिंघ मोटारवाले, नवनिहालसिंघ जहागिरदार, गुरुद्वारा बोर्डाचे अधिक्षक गुरुविंदरसिंघ वाधवा आदींची उपस्थिती होती.