नांदेड : कर्तव्यावरील पोलिस कर्मचाऱ्यांना धक्काबुक्की करून जिल्हाधिकारी यांच्या आदेशाचे उल्लंघन करून शासकिय कामात अडथळे निर्माण केला. ही घटना येवती (ता. मुखेड) या प्रकरणी मुखेड पोलिस ठाण्यात सहा जणांवर गुन्हा दाखल करण्यात आला. 

येवती (ता. मुखेड) येथे शुक्रवारी (ता. १७) कुस्ती दंगलीचा कार्यक्रम होता. या ठिकाणी बाहेरगावाहून या ठिकाणी मल्ल व भाविक येणार असल्याने मुखेड पोलिसांनी बंदोबस्त लावला होता. मुखेड पोलिस ठाण्याचे पोलिस हवालदार गंगाधर साहेबराव चिंतोरे (वय ३५) हे आपल्या एका अन्य सहकाऱ्यांसोबत त्या ठिकाणी कर्तव्यावर होते. दंगलीच्या ठिकाणी गैरकायद्याची मंडळी जमवून नाहक वाद घालत होते. वाद उफाळून येऊन कायदा व सुव्यवस्था बाधीत होऊ नये म्हणून कर्तव्यावरील गंगाधर चिंतोरे हे आपल्या सहकाऱ्यासोबत वाद मिटविण्यासाठी पुढे गेले असता त्यांनाच धक्काबुक्की करण्यात आली. एवढेच नाही तर चक्क जमावाने पोलिसांना लाथबुक्यानी मारून दगडफेक करून गंभीर जखमी केले. 

हेही वाचा - (व्हिडीओ)- चक्क... अशोक चव्हाणांनी काढले होर्डींग्ज

जिल्हाधिकारी यांचे जमावबंदीचे आदेश धुडकावले

एवढेच नाही तर या जमावाने जिल्हाधिकारी यांच्या जमावबंदीचे आदेश धुडकावून लावून शासकिय कामात अडथळा निर्माण केला. या प्रकरणी गंगाधर चिंतोरे यांच्या फिर्यादीवरून मुखेड पोलिस ठाण्यात परमेश्‍वर मार्तंड नरोटे, चंद्रकांत अशोक देवकते, आंगद सोपान देवकते, ज्ञानेश्‍वर मष्णाजी नरोटे, निनाद दिगांबर नरोटे, विठ्ठल बाबूराव नरोटे सर्व राहणार तारदवाडी (ता. मुखेड) यांच्याविरुध्द शासकिय कामात अडथळा व आदी कलमान्वये गुन्हा दाखल करण्यात आला आहे. तपास सहाय्यक पोलिस निरीक्षक भगवान मगरे करीत आहेत. त्यांनी शुक्रवारी (ता. १७) रात्री यातील परमेश्‍वर नरोटे, चंद्रकांत देवकते, अंगद देवकते आणि ज्ञानेश्‍वर नरोटे यांना अटक केल्याचे श्री. मगरे यांनी सांगितले.  

येथे क्लीक करा - अभद्र वर्तन आले अंगलट, दोन वर्षाची शिक्षा

शेततळ्यात बुडून विद्यार्थ्याचा मृत्यू 

नांदेड : शेततळ्यात बुडून एकाचा मृत्यू झाला. ही घटना काकांडी (ता. नांदेड) शिवारात ता. १६ ते १७ जानेवारी दरम्यान घडली.
 
काकांडी येथील राहणारा विद्यार्थी हणमंत संतोष बागल (वय ११) हा खेळत- खेळत गावशेजारी असलेल्या शेतात पोहचला. त्याच शेतात असलेल्या तळ्यात त्याचा बुडून मृत्यू झाला. दोन दिवस घरातून बेपत्ता झालेल्या मुलाचा नातेवाईकांनी शोध घेतला. यावेळी श्री. दासु यांच्या शेतातील शेततळ्यात पाण्यावर तरंगताना त्याचा मृतदेह सापडला. त्यानंतर नातेवाईकांनी नांदेड ग्रामिण पोलिस ठाण्यात माहिती दिली. लगेच पोलिसांनी घटनास्थळ गाठून मृतदेह पाण्याबाहेर काढून पंचनामा केला. बालाजी दिगांबर बागल यांच्या माहितीवरून आकस्मिक मृत्यूची नोंद करण्यात आली आहे. तपास पोलिस नाईक श्री. चक्रधर करीत आहेत.