हिंगोली : जिल्ह्यातून वाहणाऱ्या कयाधू नदीवर नियोजित सात उच्च पातळी बंधारे बांधण्याबाबत मुख्यमंत्री एकनाथ शिंदे व आमदार संतोष बांगर, माजी खासदार शिवाजी माने यांच्यात शुक्रवारी (ता. २१) सकारात्मक चर्चा झाली. नियम व अटी शिथिल करून बंधाऱ्यांना मंजुरी द्यावी, असे निर्देश मुख्यमंत्री एकनाथ शिंदे यांनी प्रशासनाला दिले असल्याचे आमदार संतोष बांगर यांनी सांगितले.

मुख्यमंत्री एकनाथ शिंदे तसेच सिंचन विभागातील उच्चपदस्थ अधिकारी यांच्या सोबत आमदार संतोष बांगर व माजी खा. शिवाजी माने यांची हिंगोली जिल्ह्यातील सिंचनाच्या मद्यावर मुंबईत बैठक घेण्यात आली. हिंगोली जिल्ह्यातील सिंचनाच्या मुद्यांवर माजी खासदार माने हे गेल्या अनेक वर्षांपासून लढा देत होते. त्यांच्या या लढ्याला आमदार बांगर यांनी साथ दिली. शुक्रवारी मुख्यमंत्र्यांच्या दालनात ही बैठक झाली.

मुख्यमंत्री शिंदे यांच्यासोबत चर्चा करताना आ. संतोष बांगर, ॲड. शिवाजी माने, राम कदम, सुभाष बांगर उपस्थित होते. यावेळी मुख्यमंत्री शिंदे यांनी नियम अटी शर्ती बाजूला ठेवून लवकरात- लवकर हिंगोली जिल्ह्यातील कयाधू नदीवर ७ उच्च पातळी बंधारे झाले पाहिजेत, तसेच याबाबतीत कसल्याही प्रकारची हयगय होता कामा नये,

अशा सूचना संबंधित अधिकाऱ्यांना दिल्या असल्याचे आमदार बांगर यांनी सांगितले. यामुळे कयाधू नदीवर उच्च पातळी बंधाऱ्यांचा मार्ग मोकळा झाल्याचे आ. बांगर म्हणाले. तसेच ईसापूर धरणाची दोन मीटर उंची वाढवून सापळी धरण रद्द करण्यासंदर्भात देखील सकारात्मक चर्चा करण्यात झाली असल्याचे सांगण्यात आले.