हिंगोली - जिल्हयात वसमत, कळमनुरी व औंढा तालुक्यातील अनेक गावात शनिवारी ता. १५ सकाळी सात वाजता ३.६रिश्टर स्केलचा भूकंप झाला आहे. अनेक गावांतून मोठा आवाज झाल्याने गावकऱ्यांमध्ये भितीचे वातावरण निर्माण झाले आहे. नंतर सव्वा सात वाजता परत एक हादरा बसला आहे.

हिंगोली जिल्हयातील पांगरा शिंदे ता. वसमत येथे मागील अनेक वर्षापासून भुगर्भातून आवाज येण्याचे प्रकार नित्याचेच झाले आहेत. अचानक जमिनीतून गडगडाट आवाज येऊन जमीन हादरण्याचे प्रकार यापूर्वीही घडले आहेत. आजपर्यंत या घटनांमध्ये कोणतीही जीवितहानी वा वित्त हानी झाली नाही.

शनिवारी सकाळी सात वाजता भुगर्भातून मोठा आवाज झाला. त्यानंतर सात मिनिटांनी लगेचच सव्वा सात वाजून वाजता दुसरा आवाज झाला आहे. जिल्हयातील वसमत पिंपळदरी, आमदरी, राजदरी, सोनवाडी, जामगव्हाण, कंजारा, पुर, काकडदाभा, फुलदाभा, तालुक्यातील पांगरा शिंदे, सिरळी, वापटी, खापरखेडा औंढा तालुक्यातील पिंपळदरी, लक्ष्मणनाईक तांडा, तामटीतांडा, जलालधाबा तसेच कळमनुरी तालुक्यातील बोल्डा, नांदापूर, सिंदगी, पोतरा आदी गावांत मोठा आवाज झाला तसेच हिंगोली शहरापर्यंत देखील याचे धक्के जाणवले आहेत.

रिश्टर स्केलमध्ये या भुकंपाची तीव्रता ३.६ एवढी नोंदवली आहे. त्याची खोली दहा किलोमीटर एवढी असल्याचे भुकंप मापकामध्ये नोंद झाली आहे. अवघ्या काही मिनिटांच्या अंतराने दोन वेळा आवाज झाल्याने गावकऱ्यांमध्ये भीतीचे वातावरण निर्माण झाले आहे.

भुकंपाचा हादरे जाणवलेल्या पांगरा शिदे या गावातील भागवत शिंदे यांनी सांगितले की, या परिसरात मागील सहा ते सात वर्षापासून जमीनीमधून गुढ आवाज येत आहेत. मात्र हे आवाज कशामुळे येत आहेत याची माहिती अद्यापही गावकऱ्यांना मिळालेली नाही.

एकदा या आवाजाची पाहणी करण्यासाठी स्वारातीम विद्यापीठ नांदेड येथील तज्ञांनी पाहणी केली मित्र त्याचे गुढ उकलले नाही. त्यामुळे गुढ आवाज आता गावकऱ्यांच्या अंगवळणीच पडले आहेत. प्रशासनाने या भागात पाहणी करून आवाजाचे कारण शोधून त्याची माहिती गावकऱ्यांना दिली पाहिजे.