हिंगोली : वीजपुरवठा सुरळीत ठेवून वीजबिलाची सक्ती थांबवावी, यासह विविध मागण्यांसाठी मंगळवारी (ता. २९) नर्सी नामदेव बसस्थानक परिसरातील हिंगोली ते सेनगाव रोडवर शेतकऱ्यांनी अडीच तास रास्ता रोको आंदोलन केले.

नर्सी येथे ३३ केव्ही उपकेंद्र असून, येथून जवळपास २३ गावांना वीज पुरवठा करण्यात येतो. सध्या रब्बी हंगामास सुरुवात झाली असून, गहू, हरभरा, तूर, कापूस आदी पिकांना शेतकऱ्यांना पाणी द्यावे लागत आहे. मात्र वीज पुरवठा वारंवार खंडित होण्याचे प्रमाण वाढले असल्यामुळे शेतकरी त्रस्त झाले आहेत. हा प्रकार महावितरणच्या गलथान कारभारामुळे होत असल्याने शेतकऱ्यांमधून रोष‌‌‌ व्यक्त होत आहे.

सुरू असलेली सक्तीची वीजबिल वसुली थांबवावी, शेतकऱ्यांचे विजेचे कनेक्शन तोडू नये, शेतीसाठी दिवसा आठ तास वीज पुरवठा करणे, कोटेशन भरलेल्या शेतकऱ्यांना तत्काळ विद्युत पुरवठा जोडून देणे, शेतातील जळालेले रोहित्र ४८ तासांत बसून देणे आदी मागण्यांसाठी हे आंदोलन शेतकऱ्यांनी केले. आंदोलनामध्ये डॉ. रमेश शिंदे, भिकाजी कदम, भानुदास जाधव, बद्रीनाथ घोंगडे, शाहीन पठाण, श्यामराव कावळे, माधव गाडे, वैजनाथ डांगे, प्रभाकर कदम, सुशांत घोंगडे,

रामकिशन पातळे, नामदेव काकडे, नागेश गायकवाड, उत्तम नागरे, विनोद पाटील, उत्तम मुळे, आकाश मोरे, माणिक गाडे, कावरखे पाटील, किरण गायकवाड आदी सहभागी झाले होते. आंदोलन ठिकाणी अनुचित प्रकार घडू नये, यासाठी नर्सीचे सपोनि अरुण नागरे यांनी पोलिस बंदोबस्त ठेवला होता. रास्ता रोकोमुळे मोठ्या प्रमाणात वाहतूक खोळंबली होती.