हिंगोली - जिल्ह्यातील सोयाबीन पिकावर यलो मोझॅकचा प्रादुर्भाव मोठ्या प्रमाणात झाला आहे. त्यामुळे शेतकरी संकटात सापडले आहेत. पडलेल्या रोगामुळे नगदी पीक म्हणून ओळख असलेल्या सोयाबीन पिकाच्या उत्पादनात घट होण्याची भीती शेतकऱ्यांमधून व्यक्त केली जात आहे.

यावर्षी सुरुवातील उशिरा पाऊस झाला. त्यामुळे पेरण्या लांबल्या होत्या. त्यानंतर सोयाबीन पिकावर गोगलगायींचे संकट आले. हे संकट संपत नाहीत, तोच पुन्हा यलो मोझॅकने सोयाबीनवर हल्ला चढवला.

या सर्व कारणांमुळे सोयाबीनच्या पीक वाढले, शेंगाही आल्या. परंतु, त्या भरल्या नाहीत. उत्पन्नच होणार नसल्याने अनेकांवर पीक उपटून टाकण्याची वेळ आली. जोमात आलेल्या

सोयाबीनवर यलो मोझॅक या विषाणूजन्य रोगाने हल्ला चढवल्याने पीक पिवळे पडून करपले आहे. या सततच्या रोगराईमुळे खरीप हंगाम संकटात सापडला आहे.

जिल्ह्यातील हिंगोली, कळमनुरी, वसमत, औंढा व सेनगाव तालुक्यातील अनेक गावांत सध्या सोयाबीन पिकावर यलो मोझॅकचा अट्याक मोठ्या प्रमाणात झाला आहे. त्यामुळे उत्पादनात मोठ्या प्रमाणात घट होणार असल्याचे शेतकरी सांगत आहेत.

अगोदरच निसर्गाच्या लहरीपणामुळे शेतकरी हवालदिल झाला आहे. मध्यंतरी पावसाचा सुमारे वीस ते २२ दिवस खंड पडला होता. नंतर झालेल्या पावसात जिल्ह्यातील वसमत, कळमनुरी तालुक्यातील काही ठिकाणी ढगफुटी सदृश पाऊस पडला. त्यामुळे अनेक शेतकऱ्यांचे सोयाबीन, कापूस पीक आडवे झाले. तर, जिल्ह्यातील सेनगाव तालुक्यातील अनेक गावांत कमी पाऊस झाल्याने या भागात पावसाची गरज आहे.

यावर्षी सुरवातीला अपुरा पाऊस झाला. नंतर पावसाचा खंड, परत अति पाऊस. यामुळे खरिपातील पिकांचे नुकसान झाले. सध्या सोयाबीन पिकावर यलो मोझॅकचा प्रादुर्भाव झाल्याने शेतकरी संकटात सापडले आहेत.

शिवाजी कऱ्हाळे, शेतकरी, डिग्रस