लातूर  ः उदगीर येथे झालेल्या घरफोडीतील चोरास अटक करण्यात स्थानिक गुन्हे शाखेच्या पोलिसांना यश आले असून त्यांच्याकडून एक लाख ८० हजार रुपयांचा माल जप्त करण्यात आला आहे. उदगीर येथील दत्तनगर भागात ता.२१ फेब्रुवारी रोजी योगीता उस्तुर्गे या घराला कुलूप लावून देवदर्शनासाठी जाकनाळ येथे गेल्या होत्या.
घरी कोणी नाही हे पाहून दुपारी बारा ते एकच्या दरम्यान चोरट्यांनी घराचे कुलूप तोडून आतमध्ये प्रवेश केला होता. यात चोरट्यांनी कपाटातील साडेचार तोळे सोन्याचे दागिणे व रोख चार हजार असा एकूण माल चोरून नेला होता. या प्रकरणी उदगीर पोलिस ठाण्यात गुन्हा नोंद करण्यात आला होता.

या घटनेचा समांतर तपास येथील स्थानिक गुन्हे शाखेचे पोलिस निरीक्षक सुनील नागरगोजे यांच्या मार्गदर्शनाखाली या शाखेच्या पोलिस पथकाने केला होता. हा तपास करीत असताना सोमवारी (ता. २४) येथील मळवटी रस्त्यावरील आकाश बाबुराव कांबळे (वय१९) व त्याच्या साथीदाराने ही चोरी केल्याची माहिती पोलिसाना मिळाली. त्यानंतर या पथकाने मळवटी रस्त्यावर जाऊन कांबळे याला ताब्यात घेतले.

हेही वाचा ः गुरू को मात नही देगा.. वह शिष्य कैसा? जिल्हाधिकाऱ्यांनी व्यक्त केल्या भावना

त्याच्याकडे चौकशी केली असता उदगीरची चोरी त्यानेच केल्याचे कबूल केले. त्याच्याकडून साडे चार तोळे सोन्याचे दागिणे असा एकूण एक लाख ८० हजार रुपयाचा माल जप्त करण्यात आला आहे. ही चोरी उघडकीस आणण्यासाठी पथकातील संजय भोसले, योगेश गायकवाड, राहुल सोनकांबळे, हारुण लोहार यांनी पुढाकार घेतला.