नांदेड : बालिकेचा विनयभंग करणाऱ्या एका २५ वर्षीय युवकाला येथील अतिरिक्त सहजिल्हा व सत्र न्यायाधीश अशोक धामेचा यांनी दोन वेगवेगळ्या कलमान्वये शुक्रवारी (ता. १७) सक्तमजुरी आणि दोन हजार रुपये रोख दंडाची शिक्षा सुनावली.

अर्धापूर पोलीस ठाण्याच्या हद्दीतील एका गावात ता. २३ फेब्रुवारी २०१७ रोजी सकाळी दहा वाजता त्या घरातील पती- पत्नी कामावर गेले. रोजमजुरी करणारे हे दाम्पत्य आपल्या घरी परतले. आईवडील घरी आल्यानंतर आठ वर्षीय बालिका रडत होती. हा प्रकार तिने पालकांना सांगितला. आम्ही शाळा सुटल्यानंतर आपले शाळेचे दप्तर घरी ठेवले. त्यानंतर आम्ही आपल्या नातेवाईकांकडे गेलो. तेथून परत येत असताना सायंकाळी पाच वाजता रस्त्यात सिध्दार्थ उर्फ सिध्दू केशव कसबे (वय २५) हा भेटला आणि त्याने माझ्यासोबत अभद्र वर्तन केले. यावेळी त्या बालिकेचा दहा वर्षाचा भाऊसुध्दा तिच्या सोबत होता.  

हेही वाचा - जिल्हा परिषदेत महाविकास आघाडीवर शिक्कामोर्तब

अखेर या प्रकरणात गुन्हा दाखल 

ही घटना तिने ता. २७ फेब्रुवारी २०१७ रोजी आपल्या नवऱ्याला विश्‍वासात घेऊन तयांनी या प्रकरणात तक्रार देण्याचा निर्णय घेतला. त्यानंतर या दोघांनी अल्पवयीन बालिकेला आणि तिच्या अल्पवयीन भावाला सोबत घेवून अर्धापूरचे पोलीस ठाणे गाठले. तेथे दिलेल्या तक्रारीनुसार अर्धापूर पोलिसांनी भारतीय विधानाची कलम ३५४ (ए) आणि बाललैंगिक अत्याचार प्रतिबंधक कायद्याची कलम १२ यानुसार गुन्हा नोंदविला. या गुन्ह्याचा तपास पोलीस उपनिरीक्षक त्र्यंबक गायकवाड यांच्याकडे देण्यात आला.

येथे क्लीक करा - Photos : चित्रकारांनी कुंचल्यातून साकारली चालुक्यन शिल्पकला : कुठे ते वाचलेच पाहिजे

न्यायाधीश अशोक धामेचा निकाल 

या प्रकरणातील आरोप असलेला युवक सिध्दार्थ कसबेला अटक करुन तपास झाल्यावर त्र्यंबक गायकवाड यांनी न्यायालयात दोषारोपपत्र सादर केले. न्यायालयाच्या प्रक्रियेत सात जणांनी आपले जबाब न्यायालयासमक्ष नोंदविले. उपलब्ध पुराव्याआधारे न्यायाधीश धामेचा यांनी विशेष सत्र खटला क्र.६३/२०१७ मध्ये सिध्दार्थ कसबेला कलम ३५४ (अ) प्रमाणे एक वर्ष सक्तमजुरी आणि एक हजार रुपये रोख दंड तसेच पोस्को कायद्याच्या कलम १२ प्रमाणे एक वर्ष सक्तमजुरी आणि एक हजार रुपये रोख दंड अशी शिक्षा ठोठावली. दोन्ही कलमांमध्ये देण्यात आलेला दंड न भरल्यास सिध्दार्थ कसबेला तीन महिने अतिरिक्त सक्तमजुरीचा कारावास देण्यात येईल असे निर्णयात लिहिले आहे. या खटल्यात सरकार पक्षाची बाजू ॲड. एम. ए. बत्तुल्ला (डांगे) यांनी मांडली.