टेंभुर्णी - परिसरात दिवसेंदिवस उन्हाचा चटका वाढत असल्याने याचा फटका कपाशी पिकाला बसत आहे. पातेगळसह लहान- लहान कैऱ्यांची देखील गळ होत आहे. तर पावसाअभावी पीक पिवळे पडून नुकसान होत आहे.

परिसरात पावसाअभावी अगोदरच सोयाबीन पिकाचे मोठे नुकसान झाले आहे. सोयाबीन फुल अवस्थेत असतानाच पावसाने दडी मारल्याने हे पीक शेतकऱ्यांच्या हातून गेले. दरम्यान शेतकऱ्यांची भिस्त कपाशीवर होती परंतु या पिकालाही उन्हाचा फटका बसत असून मोठ्या प्रमाणावर पातेगळ होत आहे. याशिवाय कपाशीचे हे पीक पिवळे पडत असल्याने मोठे नुकसान होणार आहे.

यासोबतच झाडाला लगडलेल्या लहान-लहान कैऱ्याही गळून पडत आहेत. शेतकऱ्यांच्या सोबत संकटाची मालिका सुरूच असल्याने शेतकरी हतबल झाला आहे. दरम्यान विहिरीत असलेले पाणी कपाशीला देऊन पिके जगविण्याची धडपड करताना अनेक शेतकरी दिसत आहे. परंतु महिनाभरापेक्षा जास्त कालावधीत या भागात पाऊसच न झाल्याने नदी-नाले कोरडेठाक आहेत.

यामुळे विहिरीची पाणी पातळी घटली असून अनेकांच्या विहिरीवरील मोटारी तासभरही चालत नसल्याचे शेतकऱ्यांनी सांगितले.

विविध रोगांच्या भक्षस्थानी पडलेले सोयाबीनचे पीक, त्याचा झालेला पाचोळा या पाठोपाठ कपाशीही सुकून जात असल्याने अडचणी वाढल्या आहेत. पावसाअभावी कपाशीचे पीक सुकत असून पातेगळ होऊन कैऱ्याही गळून पडत आहेत.

बालाजी जोशी,

शेतकरी

कपाशीच्या झाडावर जास्त पाते असल्यास काही प्रमाणात पातेगळ होत असते. परंतु मोठ्या प्रमाणावर पातेगळ होत असल्यास शेतकऱ्यांनी प्लॅन ग्रोथ रेगुलेटर या औषधाची फवारणी करावी.

अमोल शिंदे,

तालुका कृषी अधिकारी