बदनापूर : बदनापूर शहरापासून दोन किलोमीटर अंतरावर असलेल्या नवदुर्गा राजस्थान ढाब्यावर काम करणाऱ्या सुरक्षारक्षकाचा मृतदेह शेकोटीत पालथे पडलेल्या व अर्धवट जळालेल्या अवस्थेत मंगळवारी पहाटेच्या सुमारास आढळला. या घटनेची माहिती मिळताच पोलिस निरीक्षक शिवाजीराव बंटेवाड यांच्यासह बदनापूर पोलिसांनी घटनस्थळी भेट देऊन पंचनामा केला आहे.

दरम्यान, या घटनेबाबत ढाब्याच्या मालकाने दिलेल्या माहितीवरून बदनापूर पोलिस ठाण्यात मंगळवारी आकस्मिक मृत्यूची नोंद करण्यात आली आहे. दरम्यान, सुरक्षारक्षकाचा मृतदेह शेकोटीत संशयास्पदरित्या सापडल्याने हा प्रकार अपघात की घातपात? या विषयी चर्चा होत आहे.

जालना - औरंगाबाद महामार्गावर बदनापूर शहरापासून दोन किलोमीटर अंतरावर नवदुर्गा राजस्थान ढाबा आहे. या ठिकाणी सुरक्षारक्षक म्हणून मृत तुकाराम सखाराम शिंदे (वय 62 रा. कैलासनगर, बदनापूर) हे काम करीत होते. सध्या थंडीचे दिवस असल्याने ते ढाबा बंद झाल्यावर सोमवारी (ता. 12) रात्री उशिरा एका खुर्चीवर बसून समोर शेकोटी पटवून शेकत बसले होते. मात्र मंगळवारी (ता. 13) पहाटेच्या सुमारास त्यांचा मृतदेह पालथ्या व अर्धवट जळालेल्या अवस्थेत शेकोटीवर सापडला.

ही माहिती मिळताच घटनस्थळावर बघ्यांची गर्दी झाली. त्यांनी तात्काळ बदनापूर पोलिसांना माहिती दिली असता पोलिस निरीक्षक शिवाजीराव बंटेवाड व त्यांच्या सहकाऱ्यांनी घटनास्थळाचा पंचनामा करून मृतदेह उत्तरीय तपासणीसाठी बदनापूर रुग्णालयात पाठवला. दरम्यान, या संदर्भात पोलिस निरीक्षक बंटेवाड यांच्याशी संपर्क साधला असता त्यांनी, सुरक्षारक्षक शिंदे हे शाल अंगावर घेऊन खुर्चीवर बसून शेकोटी करीत होते. त्याच अवस्थेत ते पालथे शेकोटीत पडले असावेत, असा प्राथमिक अंदाज आहे.

त्यानुसार तूर्त राजस्थान ढाब्याचे मालक सुखदेव मोतीराम चौधरी यांच्या माहितीवरून पोलिसांत आकस्मिक मृत्यूची नोंद करण्यात आली आहे. अर्थात शवविच्छेदनाचा अहवाल प्राप्त झाल्यानंतर खरे चित्र स्पष्ट होईल. मृत तुकाराम शिंदे यांच्या पश्चात पत्नी आणि तीन विवाहित मुली आहेत, अशी माहिती नगरसेवक बाबासाहेब कऱ्हाळे यांनी दिली.