जिंतूर - एकादशीच्या दिवशी उपवास असल्यामुळे फराळाला भगर खाल्ल्याने सात जणांना विषबाधा झाल्याची घटना जिंतूर शहरात व तालुक्यातील ब्राम्हणगाव, बोरगळवाडी येथे घडली. मागील महिन्यात देखील तालुक्यात भगर खाल्ल्याने विषबाधा झाल्याची घटना होती.

गुरुवारी (ता. ७) विजया भागवत एकादशी होती. यादिवशी उपवास असल्यामुळे रात्री तालुक्यातील ब्राम्हणगाव, बोरगळवाडी व जिंतूर येथील काही जणांनी भगर खाल्ली. यामुळे अनेकांना मळमळ, चक्कर, उलटी होणे व पोटात दुखणे सुरु झाले. त्यामुळे शुक्रवारी सकाळी त्यांना नातेवाईकांनी जिंतूर येथील ग्रामीण रुग्णालयात दाखल केले. सर्व रुग्णांवर ग्रामीण रुग्णालय उपचार सुरू असून त्यांच्या प्रकृतीत सुधारणा होत आहे.

विषबाधा झालेल्यामध्ये अशोक कचरू माघाडे (वय-५० वर्षे), लता अशोक माघाडे (वय-४८ वर्षे, रा. ब्राम्हणगाव), भगवान सोपान पजई (वय-३४ वर्ष, रा. जिंतूर), सोनाजी किसन दुभळकर (वय-४० वर्षे), अंजना सोनाजी दुभळकर (वय३५ वर्षे), संगीता अशोक दुभळकर (वय-३० वर्षे, तिघेही रा. बोरगळवाडी) आणि लक्ष्मीबाई तुळशीराम मोरे (वय-५९ वर्षे, रा. चिंचोली दराडे) यांचा समावेश आहे.