लातूर : दुष्काळाच्या संकटाला संधी मानून तत्कालीन जिल्हाधिकारी पांडूरंग पोले व जिल्हाधिकारी जी. श्रीकांत यांच्या पुढाकाराने जिल्ह्यात विविध केलेल्या जलसंधारण कामाची दखल राष्ट्रीय पातळीवर घेण्यात आली आहे. केंद्र सरकारच्या जलसंसाधन व नदी विकास मंत्रालयाने राष्ट्रीय जलपारितोषिक जाहिर केले आहे. जिल्हा प्रशासनासोबत जाऊ (ता. निलंगा) येथील अनुसूचित जातीच्या मुलींच्या शासकीय निवासी शाळेने हे पारितोषिक पटकावले आहे. 

जागतिक तापमानवाढ कमी करण्यासाठी तसेच भुजलाची पातळी वाढवण्यासाठी केलेल्या विविध प्रयत्नांना प्रोत्साहन देण्यासाठी केंद्र सरकारच्या जल, संसाधन व नदी विकास मंत्रालयाच्या वतीने राष्ट्रीय जल पारितोषिक स्पर्धा घेण्यात येते. ऑगस्ट 2018 मध्ये राज्य, जिल्हा, नगरपालिका, पंचायत समिती, ग्रामपंचायत, शाळा अशा चौदा गटात ही स्पर्धा घेण्यात आली. जिल्हा गटातून लातूरच्या जिल्हाधिकारी कार्यालयाने तर शाळा गटातून जाऊच्या शासकीय निवासी शाळेने सहभाग घेतला होता.

मंत्रालयाने मंगळवारी (ता. 19) स्पर्धेचे निकाल जाहिर केले असून त्यात जिल्हाधिकारी श्रीकांत यांना यांना नदी व जलसंधारण श्रेणीत प्रथम जलपारितोषिक जाहिर झाले आहे. पारितोषिक व सन्मानचिन्ह असे या पुरस्काराचे स्वरूप आहे. दुष्काळाच्या काळात लोकसहभागातून पोले व श्रीकांत यांच्या पुढाकाराने जिल्ह्यात नदी, नाला खोलीकरण व रूंदीकरणासह जलसंधारणाची मोठी कामे झाली. या कामांमुळे भुजलाची पातळी वाढून जिल्ह्यातील टंचाईची तीव्रता कमी झाली. यामुळेच यंदा अपुरा पाऊस होऊनही अद्याप टॅंकर लावण्याची गरज पडली नाही. याची दखल घेऊनच मंत्रालयाने जिल्ह्याची पुरस्कारासाठी निवड केली आहे.

जाऊच्या शाळेने मुख्याध्यापक दत्तात्रय मुखम यांच्या नेतृत्वाखाली पाणी साठवण, जलसंधारण व वापराबाबत मुलींत जागृती केली. शाळेच्या विंधनविहिर परिसरात दोन लाख लिटर क्षमतेचा साठवण तलाव श्रमदानातून उभारला. शाळा परिसरातील तसेच इमारतीवरील पडणारे पावसाचे पाणी जमिनीत मुरवले. यासह विविध उपक्रमांतून तीन वर्षात शाळेतील दोनशे मुलींनी पाणी बचतीचे प्रयोग राबवले. याची दखल घेऊन मंत्रालयाने शाळेची राष्ट्रीय पारितोषिकासाठी निवड केली आहे. दीड लाख रूपये रोख, स्मृती चिन्ह व प्रमाणपत्र असे या पुरस्काराचे स्वरूप आहे. सोमवारी (ता. 25) नवी दिल्ली येथे या पुरस्काराचे वितरण होणार आहे.