लातूर : लातूर रोड ते नांदेड या नवीन रेल्वे मार्गाचे तातडीने सर्वेक्षण पूर्ण करून रेल्वे मार्गाची उभारणी करावी, अशी मागणी खासदार सुधाकर शृंगारे यांनी रेल्वे राज्यमंत्री रावसाहेब दानवे यांच्याकडे केली आहे. हा मार्ग झाल्यास लातूरसह उस्मानाबाद, नांदेड, हिंगोली, परभणी या जिल्ह्यातील जनतेला फायदा होणार आहे, असेही त्यांनी श्री. दानवे यांच्या निदर्शनास आणून दिले.

दिल्ली येथे श्री. शृंगारे यांनी श्री. दानवे यांची भेट घेवून रेल्वेच्या प्रश्नावर चर्चा केली. लातूर ते तिरुपती ही नवीन रेल्वे गाडी सुरुवात करण्यात यावी, अशी मागणीही शृंगारे यांनी यावेळी केली. या संदर्भात रेल्वे राज्यमंत्री दानवे यांनी सर्वेक्षण करण्याच्या सूचना दिल्या आहेत. लातूर जिल्ह्यातून तिरुपती दर्शनासाठी जाणाऱ्या भाविकांची संख्या मोठी आहे.

लातूरहून तिरुपतीला थेट गाडी नसल्याने भाविकांना विकाराबाद जंक्शनवरुन प्रवास करावा लागत आहे. तिरुपतीसाठी रेल्वे गाडी सुरू करावी, ही लातूरकरांची गेल्या अनेक वर्षांची मागणी आहे. या गाडीची गरज लक्षात घेऊन केंद्रीय राज्यमंत्री रावसाहेब दानवे यांनी ही गाडी सुरुवात करण्यासबंधी सर्वेक्षण करण्याच्या सूचना दिल्या आहेत.

लातूर-मुंबई एक्स्प्रेस गाडीला नव्याने एसी बोगी जोडण्यात यावी, अशी मागणीही त्यांनी केली. या गाडीला वातानुकूलित बोगी कमी आहेत. त्यामुळे प्रवाशांची अडचण होत आहे. ही मागणी देखील मंजूर करण्यात आली आहे. लातूर रेल्वे स्टेशनवर पीट लाईन उभारण्या बाबतही मंत्री दानवे यांनी अनुकूलता दर्शविली आहे. लातूर येथे उभारण्यात आलेल्या मराठवाडा रेल्वे कोच फॅक्टरीचा प्रारंभ लवकरात लवकर करण्यात यावा, ही मागणी देखील खासदार शृंगारे यांनी यावेळी केली. या बरोबरच जानवळ येथे भुयारी मार्ग उभारणे, कोविड काळात बंद झालेल्या सर्व गाड्या पुन्हा सुरु कराव्यात अशी मागणीही त्यांनी केली.