जाफराबाद - दुष्काळ आम्हाला जगू देत नाही, आरक्षण शिकु देत नाही, त्यामुळे मराठा समाजाचे आंदोलक मनोज जरांगे यांनी आरक्षणासाठी उभारलेल्या आंदोलनाकडे शासनाने लक्ष्य वेधण्यासाठी तसेच मराठा समाजाला आरक्षण मिळण्यासाठी जाफराबाद तालुक्यातील बोरगांव फदाट गावातील हर्षल फदाट या तरूणाने मुख्यमंत्री एकनाथ शिंदे यांना स्वत:च्या रक्ताने पत्र लिहीले आहे. सदरचे पत्र हे मराठा आंदोलक मनोज जरांगे यांना दिले असुन त्यांच्यामार्फत मुख्यमंत्री शिंदे यांच्यापर्यत दिले जाणार आहे.

अधिक माहीती अशी की, सकल मराठा समाजाच्या वतीने जाफराबाद येथे जिल्हा परिषद प्रशालेच्या मैदानावर मनोज जरांगे यांच्या जाहीर सभेप्रसंगी हर्षल या युवकांने रक्ताने लिहीलेले पत्र श्री. जरांगे यांना देऊन माझ्या भावना मुख्यमंत्र्यापर्यत पोहचवा, अशी विनंती केली.

हर्षल ने मुख्यमंत्री श्री शिंदे यांना लिहीलेल्या पत्रात तालुक्यात पाऊस अत्यंत कमी असल्याने दुष्काळाने शेतक-यांचे सामान्य माणसाचे जगने अवघड केले, तर मराठा समाजाला आरक्षण नसल्याने त्यांना सवलती मिळत नाही, त्यामुळे शिकुन देखिल उपयोग होत नाही, त्यामुळे मराठा समाजाला सरसगट विनाअट आरक्षण दयावे अशी मागणी केली आहे.