बीड : संरक्षण विभागाच्या खरेदीसाठी असलेल्या निकषांची पायमल्ली करत राफेल विमान खरेदीचा करार झाला आहे. मर्जीतल्या समुहाला हा करार मिळावा म्हणून हा प्रकार झाला असून यामध्ये 41 हजार कोटी रुपयांचा घोटाळा झाल्याचा आरोप जिल्हाधिकाऱ्यांना दिलेल्या निवेदनात करण्यात आला. 

राफेल विमान खरेदीत गैरव्यवहार झाल्याचा आरोप करत याची चौकशी करण्याची मागणी करण्यासाठी बुधवारी (ता. 12) काँग्रेसचे प्रदेश उपाध्यक्ष बसवराज पाटील यांच्या नेतृत्वाखाली जिल्हाधिकारी कार्यालयासमोर निदर्शने करण्यात आली. यानंतर त्यांनी पत्रकार परिषदही घेतली. 537 कोटी रुपयांचे विमान 1600 कोटी रुपयांना खरेदी केल्याचा आरोप यावेळी पाटील यांनी केला. ज्या कंपनीसोबत करार केला त्या कंपनीला संरक्षण विषयक यंत्रसामुग्री बनविण्याचा पुर्वीचा कुठलाही अनुभव नाही. अनुभव असलेल्या कंपनीला डावलून केवळ 14 दिवसांपूर्वी स्थापन झालेल्या कंपनीसोबत करार केल्याचा आरोप बसवराज पाटील यांनी केला.

याबाबत जिल्हाधिकाऱ्यांनाही निवेदन दिल्याचे ते म्हणाले. काँग्रेस अध्यक्ष राहूल गांधी यांच्या सुचनेनुसार देशभर विविध जिल्ह्यांत आंदोलन करण्यात येत असल्याचे ते म्हणाले. यावेळी माजी मंत्री सुरेश नवले, जिल्हाध्यक्ष राजकिशोर मोदी, माजी आमदार सिराज देशमुख, पक्षाचे जिल्हा प्रभारी भीमराव डोंगरे, महादेव धांडे, दादासाहेब मुंडे, कुंदा काळे, मिनाक्षी पांडूळे, सर्जेराव काळे, शहादेव हिंदोळे उपस्थित होते.