कळंब (जि. उस्मानाबाद) : गावखेड्यातून पोटाची खळगी भरण्यासाठी गेलेले मजूर लॉकडाऊनमुळे गावाकडे निघाले आहेत; मात्र संचारबंदीमुळे मोठी अडचण झाली आहे. कोल्हापूरहून बुलडाणा जिल्ह्यातील २४ ऊसतोडणी मजुरांना घेऊन एक ट्रक रविवारी (ता. २९) अंबाजोगाईमार्गे बुलडाण्याकडे निघाला होता; मात्र सीमाबंदीमुळे पोलिस प्रशासनाच्या कारवाईच्या धास्तीने या २४ मजुरांना तालुक्यातील रांजणी येथील माळरानावर सोडून ट्रकचालकाने पलायन केल्याची माहिती समोर आली आहे. ऊसतोड मजुरांच्या जेवण व निवासाची सोय महसूल प्रशासनाने केल्याचे कळतंय.

कोरोना विषाणू या महामारी आजाराने सर्वसामान्य नागरिकांचे जगणे कठीण झाले आहे. साखर कारखाने बंद झाल्याने ऊसतोडीसाठी गेलेले मजूर गावाकडे परत निघाले आहेत; मात्र लॉकडाऊनमुळे अडचणी निर्माण झाल्या आहेत. ऊसतोडीसाठी कारखान्यांकडे असलेल्या मजुरांना सोडू नये, त्यांची व्यवस्था कारखाना परिसरात करावी, असे मुख्यमंत्री उद्धव ठाकरे यांनी वारंवार सांगितले आहे. तरीही मजुरांचे लोंढे गावाकडे मिळेल त्या वाहनाने निघाले आहेत.

बुलडाणा जिल्ह्यातील २४ मजूर कोल्हापूर येथील साखर करखान्यांकडे ऊसतोडीसाठी गेले होते. हे सर्व मजूर एका ट्रकमधून अंबाजोगाईमार्गे बुलडाण्याकडे निघाले होते. सीमाबंदीमुळे पोलिस प्रशासनाकडून प्रत्येक वाहनांची कसून तपासणी करण्यात येत आहे. पोलिस कारवाईच्या भीतीमुळे ट्रकचालकाने मजुरांना रांजणी (ता. कळंब) येथील माळरानावर सोडून दिल्याची धक्कादायक घटना समोर आली आहे. या मजुरांनी चालत जात कसेबसे रांजणी गाव गाठले. दरम्यान, जिल्हा परिषदेच्या शाळेत आश्रयासाठी हे मजूर थांबले असता, त्यांना परिसरातील लोकांनी हाकलून दिले, अशी माहितीही समोर आली आहे.

हेही वाचा : लातूर जिल्ह्यात दहा नवीन भोजनालय मंजूर, शिवभोजनाची थाळी मात्र पार्सलमधूनच

दरम्यान, तहसीलदार मंजूषा लटपटे यांनी तातडीने त्या ठिकाणी भेट देऊन त्यांच्या जेवण व राहण्याची सोय करण्याच्या सूचना संबंधितांना केल्या. रास्त भाव दुकानदार ए. ए. आगरकर, उपसरपंच राजाभाऊ आगरकर, पोलिसपाटील श्रीमंत आगरकर, ग्रामसेवक श्री. चोरमले, तलाठी श्रीमती देशमुख यांच्या लक्षात ही गंभीर बाब आली. या सर्वांची आरोग्य तपासणी करून या मजुरांना घेऊन रांजणी येथील कारखाना परिसरातील शाळेत त्यांच्या मुक्कामाची आणि जेवणाची सोय करण्यात आली. 

कोरोनाच्या धास्तीने मजुराला दिले हाकलून 
रांजणी येथे हे मजूर थांबले असता, संख्या पाहून परिसरातील नागरिकांची झोप उडाली. हे जर पॉझिटिव्ह असतील तर परिसरात कोरोना विषाणूची लागण होईल, या भीतीपोटी नागरिकांनी या मजुरांना थांबण्यास विरोध केला, असे सांगण्यात आले.