सेलू : लोअर दूधना प्रकल्पात सद्यस्थितीत जीवंत जलसाठा १७१.६०३ दलघमी असून जीवंत साठा टक्केवारी ७०.८५ असल्याने शनिवारी सकाळी साडेसात वाजता धरणाचे दोन दरवाजे प्रत्येकी ०.३५ मीटरने उघडण्यात आले असून दूधना नदीपात्रात २,३५७ क्युसेसने विसर्ग सोडण्यात आला आहे.

लोअर दुधना प्रकल्पात होत असलेली पाण्याची आवक लक्षात घेता जलाशय प्रचलन आराखड्यानुसार शनिवारी प्रकल्पाचे दोन दरवाजे प्रत्येकी ०.३५ मीटरने उघडण्यात आले असून दूधना नदीपात्रात एकूण २,३५७ क्युसेसने विसर्ग करण्यात येत आहे. त्यामुळे दूधना नदीपात्रातील पाणी पातळी वाढून पूरस्थिती होण्याची शक्यता नाकारता येत नाही.

तरी नदीकाठच्या गावांना सतर्क राहण्या बाबत तसेच नदीपात्रात कुणीही जाऊ नये, पाळीव प्राणी, गुरेढोरे, विद्युत मोटारी तसेच इतर तत्सम साहित्य इत्यादी तत्काळ काढून घेण्या बाबत. तसेच कुठलीही जीवित वा वित्तहानी होणार नाही. या बाबत संबधित गावांना महसूल विभागामार्फत सावधानतेचा इशारा देण्यात आला आहे.