पाथरी- पाण्याखाली असलेल्या वाळूचा उपसा करण्यासाठी वाळू माफियांनी बोट व मोटार या यंत्राच्या सहाय्याने वाळू चोरीचा आखलेला डाव जागरूक पाटोदा ग्रामस्थांनी उधळून लावला आहे. ही घटना मंगळवारी (ता.३) सकाळी घडली. यावेळी ग्रामस्थांनी काही परप्रांतीय मजुरांना पकडून तहसीलदारांना माहिती दिल्यानंतर महसूल व पोलिस यंत्रणा घटनास्थळी दाखल झाली. तर, दुपारी स्फोटकांनी बोट उद्ध्वस्त केली.

अवैध वाळू उपसा व वाहतुकीच्या माध्यमातून मोठा पैसा मिळत असल्याने पाथरी तालुक्यातील गोदावरी नदी किनारी भागातून वाळूची सर्रास चोरटी वाहतूक व विक्री होत आहे. अवैध वाळू वाहतुकीसाठी हायवाऐवजी कमी वेळात गल्ली बोळात जाणारा पिकअप व छोटा हत्ती ही वाहने वापरली जात आहेत. ज्याठिकाणी गोदावरी नदी पात्र कोरडे आहे,

त्याठीकाणी माणसाच्या व जेसीबीच्या सहाय्याने अवैध वाळू उत्खनन करून विक्री होत आहे. तालुक्यातील गोदावरी नदीवर बांधण्यात आलेल्या उच्चपातळी बंधाऱ्याच्या बॅकवॉटरमधून यारी मशिन, बोटच्या सहाय्याने वाळू उपसा करताना डाकू पिंप्री शिवारात कारवाई झाल्याच्या घटना या पूर्वी घडलेल्या आहेत. आता वाळू माफियांनी त्यांचा मोर्चा ढालेगाव बंधाऱ्याच्या बॅकवॉटर खाली असलेल्या वाळूकडे वळविला आहे.

मिळालेल्या माहितीनुसार, मंगळवारी सकाळी पाटोदा गावाशेजारील गोदावरी नदीपात्रात बोट, मोटार व लोखंडी पाइप अशी आधुनिक वाळू उपसा करणारी यंत्रणा काही लोक नदीपात्रात चालवत असल्याचे ग्रामस्थांना दिसले. यावेळी ग्रामस्थांनी घटनास्थळी धाव घेतली असता या ठिकाणाहून पळून जाण्याच्या तयारीत असलेली काही परप्रांतीय मजूर त्यांना सापडले.

या सर्वांना गावात आणून याची माहिती तहसीलदार सौदागर तांदळे यांना देण्यात आली. पोलिस व महसूलचे पथक घटनास्थळी दाखल झाले होते. महसूल विभागाकडून घटनास्थळी पंचनामा करण्याची कारवाई करण्यात येत होती. दरम्यान, जप्त करण्यात आलेली सर्व यंत्रसामग्री स्फोटकाच्या साह्याने उद्ध्वस्त करण्यात आली असून घटनेची पोलिसांत नोंद करण्याची प्रक्रिया सुरू होती.