वालूर ( जिल्हा परभणी ) : ग्रामीण भागातील नागरिकांचा कोरोनापासून बचाव व्हावा नागरिकांनी कोरोनाचे लसीकरण करुन घ्यावे असे आवाहन करुन जेष्ठ नागरिकांच्या आरोग्याची काळजी घेतल्याने ईश्वर सेवा केल्याचे पुण्य प्राप्त होते असे प्रतिपादन जिल्हा परिषदेचे मुख्य कार्यकारी अधिकारी शिवानंद टाकसाळे यांनी बुधवारी (ता. २४) वालूर गावात केले. 

वालूर (ता. सेलू ) येथील प्राथमिक आरोग्य केंद्रात मुख्य कार्यकारी अधिकारी शिवानंद टाकसाळे यांनी बुधवारी कोरोना लसीकरण संदर्भात झालेल्या कार्यक्रमात नागरिकांशी दिलखुलास संवाद साधला. यावेळी गावातील तरुणांसह जेष्ठ नागरिकांनी कोरोनाच्या लसीकरणास प्रतिसाद दिला. जेष्ठ नागरिकांना कोरोनाच्या प्रादुर्भावापासून बचाव व्हावा म्हणून ही लस किती फायदेशीर आहे व ती लस प्रत्येक नागरिकांनी घेण्याचे आवाहन श्री  टाकसाळे यांनी केली.
यावेळी आरोग्य विभागातील सर्व अधिकारी आणि कर्मचाऱ्यांना कोरोना लसीकरणाची प्रभावी अंमलबजावणी करण्यासाठी स्पष्ट सूचना देण्यात आल्या.

हेही वाचा - बहीण- भावाच्या प्रेमाचा दोर, शिमग्याचा हार; इंटरनेट काळातही माहेरवासिनीचे भावाच्या वाटेकडे लक्ष

यावेळी जिल्हा परिषद सदस्य राजेंद्र लहाने, जिल्हा हिवताप अधिकारी डाॅ.विद्यासागर पाटील, गटविकास अधिकारी विष्णू मोरे, तालुका वैद्यकीय अधिकारी डाॅ.रावजी सोनवणे, महिला व बालकल्यान अधिकारी एस. बी. कच्छवे, गणेश मुंढे, महम्मद ईस्माइल आदींची उपस्थिती होती.

आतापर्यंत ३८३ नागरिकांनी कोरोना लस घेतली. प्रास्ताविक डाॅ.रावजी सोनवणे यांनी केले. संचलन व आभार डाॅ.दिपक सावळे यांनी मानले. प्राथमिक आरोग्य केंद्राचे वैद्यकीय अधिकारी डाॅ.प्रकाश वाठोरे, डाॅ.दिपक सावळे, डाॅ.अक्षय डाके, डाॅ.योगिता मालाणी, सुहास सदावर्ते, परिवेक्षक वसंत पवार यांच्यासह आरोग्य कर्मचार्यांनी पुढाकार घेतला. 

संपादन- प्रल्हाद कांबळे