नांदेड  : जिल्ह्यातील बीटी कपाशीवर गुलाबी बोंडअळीचा प्रादुर्भाव दिसून येत आहे. याचे प्रमाण काही ठिकाणी चार ते पाच टक्के, तर काही ठिकाणी त्यापेक्षा अधिक आढळून आले आहे. यामुळे शेतकऱ्यांनी या अळीचे नियंत्रण करण्याचे आवाहन नांदेड कापूस संशोधन केंद्राचे कीटकशास्त्रज्ञ डॉ. प्रा. शिवाजी तेलंग यांनी केले आहे.

परभणी येथील वसंतराव नाईक मराठवाडा कृषी विद्यापीठातंर्गत असलेल्या नांदेड येथील कापूस संशोधन केंद्राकडून गुलाबी बोंडअळीच्या प्रादुर्भावाबाबत वेळोवळी निरीक्षक सुरु आहे. या केंद्राचे कीटकशास्त्रज्ञ डॉ. प्रा. शिवाजी तेलंग यांनी कंधार तालुक्यातील अांबुलगा, गौळ, बिजेवाडी, फुलवळ या गावांतील शेतकऱ्यांच्या कपाशीची पाहणी मंगळवारी (ता. १९) केली. या वेळी त्यांना गुलाबी बोंडअळीचे प्रादुर्भाव दिसुन आला. यावेळी त्यांनी शेतकऱ्यांना अळिच्या नियंत्रणासाठी मार्गदर्शन केले. या वेळी त्यांच्या समवेत तालुका कृषी अधिकारी रमेश देशमुख, सहायक तंत्रज्ञान व्यवस्थापक व्ही. बी. पुलकुंडवार, वरिष्ठ संशोधन सहायक जी. पी. सोनुले, प्रकल्प सहायक व्ही. के. जाधव उपस्थित होते.

पाहणी दरम्यान, कपाशीवर चार ते पाच टक्के गुलाबी बोंडअळीचा प्रादुर्भाव आढळून आला. तसेच कामगंध सापळ्यात चार ते पाच पतंग आढळून आले. कपाशीची सध्या पाहिली वेचणी चालू आहे. शिल्लक राहिलेल्या १५ ते २० बोंडांत गुलाबी बोंडअळी येण्याची शक्यता असल्यामुळे शेतकऱ्यांनी उपाययोजना कराव्यात.

निंबोळी अर्काची फवारणी करावी

शेतकऱ्यांनी दीड टक्के निंबोळी अर्काची फवारणी करावी, ट्रायकोग्रामा बॅक्टरिया या परोपजिवी किडीचे एकरी तीन कार्ड याप्रमाणे वापर करावा, परोपजिवी किडीची उपलब्धता उपविभागीय कृषी अधिकारी कार्यालय, धनेगाव येथे उपलब्ध असल्यामुळे त्याचा शेतकऱ्यांनी लाभ घ्यावा, हेक्टरी पाच कामगंध सापळ्यांचा वापर करून त्यात नवीन पेक्तीनो लूरचा वापर करावा, आर्थिक नुकसानीची पातळी ओलांडल्यानंतर स्पिनोसड चार ईसी चार मिली किंवा सायपर मिथ्रिन दहा टक्के ईसी दहा मिली दहा लिटर पाण्यात मिसळून फवारणी करावी, दुसऱ्या वेचणीनंतर कपाशीचे फरदड न ठेवता कापूस काढून दुसरे पीक घ्यावे. यामुळे पुढील वर्षी गुलाबी बोंडअळी येण्याची शक्यता कमी राहील, असे त्यांनी शेतकऱ्यांना आवाहन केले.
----