हिंगोली : प्रधानमंत्री किसान सन्मान निधी योजनेच्या पात्र लाभार्थींनी ३१ जुलैपर्यंत बँक खाती आधार संलग्न करावे, असे आवाहन निवासी उपजिल्हाधिकारी चंद्रकांत सूर्यवंशी यांनी प्रसिद्धिपत्रकाद्वारे केले. त्यांनी पत्रकात नमूद केले की, प्रधानमंत्री किसान योजनेंतर्गत सर्व पात्र लाभार्थींना ई-केवायसी प्रमाणीकरणाची प्रक्रिया बंधनकारक करण्यात आली आहे. प्रधानमंत्री किसान सन्मान निधी पोर्टलवरील नोंदणीकृत पात्र लाभार्थींची ई-केवायसी करण्यासाठी विशेष जनजागृती मोहीम राबवून ३१ मेपर्यंत पूर्ण करण्याच्या केंद्र शासनाच्या सूचना होत्या. त्या अनुषंगाने राज्यातील सर्व पात्र लाभार्थींना ई-केवायसी करण्यासाठी ओटीपी किंवा बायोमॅट्रिक हे पर्याय उपलब्ध करून दिलेले आहेत.

सद्यःस्थितीत सात जुलैअखेर राज्यातील आधार प्रमाणित १०६.६८ लाख लाभार्थींपैकी ६०.३५ लाख लाभार्थींचे ई-केवायसी प्रमाणिकरण पूर्ण झाले आहे. उर्वरित ४६.४४ लाख लाभार्थींचे ई-केवायसी प्रमाणिकरण प्रलंबित आहे. याबाबत केंद्र शासनाने दूरचित्रवाणी परिषदेमार्फत राज्यातील प्रलंबित ई-केवायसी ३१ जुलै अखेरपर्यंत पूर्ण करण्याच्या स्पष्ट सूचना दिलेल्या आहेत. ज्या लाभार्थींचे ई-केवायसी पूर्ण होणार नाहीत त्यांना पुढील हप्त्याचे वितरण करण्यात येणार नाही. त्यामुळे प्रधानमंत्री किसान योजनेंतर्गत पात्र लाभार्थींनी योजनेचा लाभ घेण्यासाठी निर्धारित वेळेत ३१ अखेर पर्यंत ई-केवायसी प्रमाणिकरण करून घ्यावेत.