वैजापूर (जि.औरंगाबाद) ः शहरानजीक असलेल्या रोटेगाव परिसरातील शेतामध्ये सुरू असलेल्या एका पत्त्याच्या जुगार अड्ड्यावर औरंगाबाद येथील स्थानिक गुन्हे शाखेच्या पोलिसांनी छापा टाकून 24 जुगाऱ्यांना सोमवारी (ता.17) पकडले. पोलिसांनी त्यांच्याकडून रोख एक लाख 34 हजार रुपयांसह सात दुचाकी व 24 मोबाईल संच असा एकूण सहा लाख रुपये किमतीचा मुद्देमाल हस्तगत केला.

शहरानजीक असलेल्या रोटेगाव रेल्वे रुळाच्या बाजूला असलेल्या एका शेतामध्ये पत्त्याचा जुगार अड्डा सुरू असल्याची माहिती औरंगाबाद येथील स्थानिक गुन्हे शाखेच्या पोलिसांना खबऱ्यामार्फत मिळाली. त्यानुसार पोलिस निरीक्षक बी. जी. फुंदे, फौजदार बी. जी. दुलत, किरण गोरे, रमेश अफसनवाड व अन्य कर्मचाऱ्यांनी सोमवारी सायंकाळी साडेपाचच्या सुमारास जुगार अड्ड्यावर छापा टाकला असता तेथे 24 जण झन्नामन्ना नावाचा जुगार खेळताना आढळून आले. पोलिसांनी त्यांच्याकडून रोख एक लाख 34 हजार रुपयांसह जुगाराचे साहित्य, सात दुचाकी, 24 मोबाईल संच असा एकूण सहा लाख एक हजार 130 रुपयांचा मुद्देमाल हस्तगत केला. या प्रकरणी रात्री उशिरापर्यंत वैजापूर पोलिस ठाण्यात गुन्हा दाखल करण्याची प्रक्रिया सुरू होती.

दरम्यान, शहर व परिसरात गेल्या काही दिवसांपासून अवैध धंद्यांनी उच्छाद मांडला असून केवळ पोलिसांच्या हप्तेखोरीमुळे अवैध धंदे बेफाम सुरू आहेत. साधारणतः दोन महिन्यांपूर्वी तालुक्‍यातील शिऊर येथे औरंगाबाद येथील स्थानिक गुन्हे शाखेच्या पथकाने एकाचवेळी दोन जुगार अड्ड्यांवर छापा टाकून 13 जुगाऱ्यांना पकडले होते. त्यानंतर थोड्याच दिवसांत पुन्हा गुन्हे शाखेच्या पथकाने वैजापूर पोलिस ठाण्याच्या हद्दीतील जुगार अड्ड्यांचा पर्दाफाश करून स्थानिक पोलिसांचे पितळ उघडे पाडले आहे. या कारवाईमुळे शहर व परिसरात अवैध धंदे बिनबोभाटपणे सुरू आहेत, हेच यावरून सिद्ध होते. पोलिसांनी अवैध धंद्यासाठी जणू अलिखित परवानगीच दिली की काय, असेच चित्र पाहावयास मिळत आहे.