श्रीगोंदे: बेलवंडी पोलिस ठाण्यातील ‘कलेक्टर’ असणाऱ्या पोलिसावर लाचलुचपत विभागाच्या पथकाने आज लक्ष केंद्रित केले होते. त्या पोलिसाविरुद्ध एक तक्रार होती.

ठरल्याप्रमाणे रक्कम घेऊन फिर्यादी ठाण्यात गेला, पण तेथे ‘साहेबां’चे ऑडिट सुरू असल्याने, सदर पोलिसाने आलेल्या त्या व्यक्तीला ‘कपाटात ठेव’ असा संदेश दिला आणि त्याचवेळी एसबीचे पथक ठाण्यात पोचले.

पथकाला पाहताच, कुठलाही विचार न करता संशयित त्या पोलिसाने धूम ठोकली. रात्री उशिरापर्यंत उसाच्या शेतात शोध सुरू असला, तरी तो पोलिस काही सापडला नव्हता.

सिनेमाला लाजविणारी घटना बेलवंडी पोलिसांत घडली. त्याबाबत गुन्हा दाखल करण्याचे काम सुरू आहे, असे सांगितले गेले.

समजलेल्या माहितीनुसार, बेलवंडी पोलिस ठाण्यात ‘साहेबां’च्या जवळ असणाऱ्या एका पोलिसाविरुद्ध एसीबीकडे लाच मागितल्याची तक्रार दाखल झाली. आज लाच देण्याचा दिवस असल्याने एसीबीचे पथक बेलवंडीत होते. एसीबीच्या इशाऱ्यावर तो फिर्यादी बेलवंडी पोलिस ठाण्यात दाखल झाला.

चार हजारांची लाच असल्याची माहिती आहे. ती रक्कम पोलिसांकडे घेऊन गेला, मात्र ठाण्यात वरिष्ठांचे ऑडिट असल्याने त्या पोलिसाने, आणलेली रक्कम कपाटात ठेवा, असे सांगितले. फिर्यादीने रक्कम कपाटात ठेवली आणि पथक त्या पोलिसाच्या समोर उभे ठाकले.

पण तो पोलिसही चतुर निघाला. आपण सापडलो, हे लक्षात येताच पथकाच्या साक्षीने त्याने ठाण्यातून धूम ठोकली. एरवी एखादा आरोपी ठाण्यातून पळून जाताना पाहिले आहे, मात्र आज पोलिसच पळाला.

तो पळून जाईल असे न वाटल्याने पथक काहीसे बिनधास्त होते आणि त्याचाच फायदा घेऊन आरोपी ठरणारा पोलिस पळून गेला.

ठाण्याच्या जवळच उसाचे क्षेत्र आहे. तेथे तो लपल्याची चर्चा होती, मात्र रात्री उशिरापर्यंत तो सापडला नव्हता. या घटनेची नोंद करून गुन्हा दाखल करण्याचे काम सुरू असल्याचे सांगण्यात आले.