जालना -  मागील दोन वर्षात कपाशी पिकावरील गुलाबी बोंडअळीचा प्रादुर्भाव नियंत्रणात ठेवण्यात यश आलेले आहे. मात्र यंदा बोंडअळीचा धोका उद्‌भवू नये म्हणून पूर्व हंगामी लागवड टाळण्यासाठी कृषी विभागाने कपाशीच्या बियाणे विक्रीला स्थगिती दिली होती. कृषी संचालकांनी आता सोमवारनंतर (ता.२५) बियाणे विक्रीस कृषी केंद्राना परवानगी दिली असल्याची माहिती जिल्हा परिषदेचे कृषी विकास अधिकारी भीमराव रणदिवे यांनी दिली आहे. 

जिल्ह्यात मोठ्या प्रमाणात कपाशीची लागवड करण्यात येते. गत वर्षी दोन लाख ८६ हजाराहून अधिक हेक्टरवर कपाशीची पिकाची लागवड झाली होती. यावर्षी जिल्ह्याला १२ लाख ७९ हजार कपास बियाणाचे पाकिटे लागणार आहे.

हेही वाचा :  जालन्यातील शेतकऱ्यांना घरपोच खते 

जिल्ह्यात बेमोसमी पावसामुळे शेतकऱ्यांनी जानेवारीनंतरही कपाशीचे पीक शेतात ठेवले होते. तसेच वाढीव पावसामुळे लांबलेल्या कापूस हंगाम त्याचबरोबर सिंचनाची सुविधा असलेल्या शेतकऱ्यांच्या शेतात एप्रिल महिन्यातही कपाशीचे पीक उभे होते. त्यामुळे बोंडअळीस नियमित खाद्य पुरवठा होऊन पुढील हंगामातील पिकांवर बोंड अळीचा प्रादुर्भाव होऊ शकतो.

हेही वाचा : पीककर्जावर शेतकऱ्यांची मदार

जून महिन्याच्या पहिल्या आठवड्यात खरीप हंगाम सुरू होतो. मात्र, सिंचनाची व्यवस्था असलेले अनेक शेतकरी त्यापूर्वीच त्याची लागवड करतात. पूर्वहंगामी लागवड झाल्यामुळे बोंडअळीचा प्रादुर्भाव होण्याची शक्यता असते. त्यामुळे पूर्व हंगामी लागवड रोखण्यासाठी कृषी विभागातर्फे सर्व कृषी सेवा केंद्राना कपाशीचे बियाणे शेतकऱ्यांना विक्री न करण्याच्या सूचना दिल्या होत्या. आता लागवड कालावधी जवळ आल्याने बियाणे विक्री सुरू करण्यात येणार आहे.ता.२५ मे नंतर हे बियाणे शेतकऱ्यांना खरेदी करता येणार आहे. 

बोंडअळीचा प्रादुर्भाव रोखण्यासाठी हे करा 

लागवडीपूर्वी खोल नांगरट करून पूर्व हंगामी म्हणजे मे महिन्यातच कपाशीची लागवड टाळावी. जून महिन्यात जमिनीत पुरेसा ओलावा आल्यानंतरच पेरणी करावी. लागवड करताना शेताच्या चहूबाजूने नॉन बीटी कपाशीची लागवड करावी. नत्र खताचा जास्‍तीचा वापर केल्यास पिकांची कायिक वाढ होऊन गुलाबी बोंड अळीचा प्रादुर्भाव वाढतो. म्हणून माती परीक्षणाच्या आधारावरच खतांच्या मात्रेचा वापर करण्याचे आवाहन कृषी विकास अधिकारी भीमराव रणदिवे यांनी केले आहे.