औरंगाबाद - शहरातील पथदिव्यांवरून टाकण्यात आलेले धोकादायक केबल काढण्याचे आदेश न्यायालयाने महापालिका प्रशासनाला दिले आहेत. त्यानुसार आठ दिवस मोहीम राबविण्यात आली. मात्र, अद्याप अनेक रस्त्यांवर धोकादायक केबल कायम असून, मोहीम अर्धवट थांबविण्यात आल्याने नागरिकांच्या जिवाला धोका कायम आहे.

पथदिव्यांसाठी महापालिकेने शहरात सुमारे ४० हजार खांब उभारले आहेत. या खांबांचा वापर सध्या इंटरनेट, टीव्हीचे केबल टाकण्यासाठी केला जात आहे. अनेकवेळा हे केबल रस्त्यावर लोंबकळून नागरिकांच्या जिवाला धोका निर्माण होऊ शकतो. त्यामुळे पथदिव्यांवर असलेले केबल काढण्याचे आदेश न्यायालयाने नुकतेच महापालिकेला दिले आहेत. त्यानुसार नऊ प्रभागांसाठी नऊ पथके तयार करून महापालिकेने मोठा गाजावाजा करीत कारवाई सुरू केली. मात्र, नेहमीप्रमाणे ही मोहीमदेखील अर्धवट राहिली आहे. सेंट्रल नाका रस्त्यावर केबल काढताना योग्य खबरदारी घेतली नसल्यामुळे एका चिमुकलीला गळफास बसल्याची घटना घडली होती. चिमुकलीच्या उपचारासाठी आलेला खर्च महापालिकेला करावा लागला. त्यानंतर ही मोहीम रखडली आहे. अतिक्रमण हटाव विभागात कर्मचाऱ्यांची कमतरता असल्याने मोहीम थांबली असल्याचे सांगण्यात येत आहे. अद्याप शहरातील अनेक रस्त्यांच्या पथदिव्यांवर केबलचे जाळे कायम आहे.

शंभर किलोमीटर केबल केली जप्त 
शहरातील मुख्य रस्त्यावर म्हणजेच जालना रोडवर मोठ्या प्रमाणात केबल होती. त्यानुसार केबल कट करून ती जप्त करण्यात आली. जालना रोडसह इतर रस्त्यांवर आतापर्यंत शंभर किलोमीटर केबल जप्त करण्यात आल्याचे अधिकाऱ्यांनी सांगितले.