(रविंद्र गायकवाड)

बिडकीन : येथील फारोळा गावानजीक असलेल्या गट क्रमांक १०० मधील अजित सिड्स कंपनीत एका कामगाराचा मृतदेह गळफास घेतलेल्या अवस्थेत आढळल्याची घटना आज (ता.१५) मंगळवार रोजी सकाळच्या वेळी उघडकीस आली आहे.

वैभव युवराज पवार वय. २४ वर्ष, लिंबगाव,ता.पैठण असे मृतदेह आढळलेल्या तरुणाचे नाव आहे.तब्बल तीन ते चार दिवसांपासून हा गळफास घेतलेल्या अवस्थेत असलेला हा मृतदेह असल्याने घातपात असल्याचा संशय नातेवाईकांच्या वतीने घेण्यात येत असल्याने तब्बल कंपनी व्यवस्थापन व पोलिस अधिकारी यांनी समंजसपणा दाखवून मृतदेह ग्रामीण रुग्णालय बिडकिन येथे हलविण्यात आला असल्याची माहिती पोलिसांनी दिली आहे.

वैभव पवार हा फारोळा हद्दीतील गट क्रमांक १०० मधील अजित सिड्स कंपनीच्या आवारात कामगारांना दिलेल्या घरात राहत होता तर गट क्रमांक ७२ मधील अजित सिड्स कंपनीत मेंटेनन्स सुपरवायझर म्हणून मागील काही वर्षांपासून काम पाहत होता.मागील काही दिवसांपुर्वी कंपनीला दसरा व रविवार सुट्टी असल्याने वैभव बाहेर न पडला असावा परंतु आज कामगारांनी गळफास घेतलेल्या अवस्थेत मृतदेह पाहिला असल्याची माहिती कंपनी व्यवस्थापन आणि पोलिसांना दिली आहे.

मागील तीन ते चार दिवसांपासून वैभव पवार घराबाहेर किंवा कंपनीच्या कामाला आला कि नाही किंवा यामागील अडचणी काय आहेत हे पाहण्यासाठी ना सुरक्षारक्षक गेला,ना कंपनी व्यवस्थापन आणि कर्मचारी गेला,तर माझ्या भावाचा घातपात झाला असा आरोप मृताचे नातेवाईकांच्या वतीने केला जात आहे.

घटनेची माहिती मिळताच बिडकिन पोलिस ठाण्याचे सहायक पोलिस निरीक्षक निलेश शेळके, पोलिस उपनिरीक्षक अशोक माने, सहायक पोलिस फौजदार निकाळजे, तांगडे, पोलिस हेड कॉन्स्टेबल धनेधर, मगर, गायकवाड,राठोड आदींनी घटनास्थळी धाव घेत स्थानिक नागरिकांच्या मदतीने मृतदेह ग्रामीण रुग्णालय बिडकिन येथे हलविण्यात आला आहे.बिडकीन पोलिस ठाणे येथे अकस्मात मृत्यूची नोंद करण्यात आली असून पुढील तपास सहायक पोलिस निरीक्षक निलेश शेळके यांच्या मार्गदर्शनाखाली पोलिस उपनिरीक्षक अशोक माने हे करित आहेत