सेलू (जि.परभणी) : परभणी जिल्हा मध्यवर्ती बॅंक शाखा, डासाळा (ता.सेलू) या बँकेत शाखाधिकारी व रोखपाल रोख रक्कम घेऊन जात असतांना त्यांच्या दुचाकीस चोरट्यांनी दुचाकीची धडक देऊन डोळ्यात मिरची पुड टाकली. त्यांच्या हातातील  दोन लाख रूपये रोकड असलेली बॅग पळविल्याची घटना सोमवारी (ता.३०) सकाळी अकरा वाजेच्या दरम्यान घडली. घटनेचा पंचनामा सेलू पोलिसांनी केला असून दिवसाढवळ्या घडलेल्या या घटनेने परिसरातील नागरिकात भितीचे वातावरण निर्माण झाले.

पुन्हा दुचाकीवरील चोरट्यांचा धुमाकुळ
डासाळा (ता.सेलू) येथे परभणी जिल्हा मध्यवर्ती बँकेची शाखा आहे. या शाखेत बँक शाखाधिकारी म्हणून के. एन. मांडे तर रोखपाल म्हणून पवन फुलमाळी हे कर्मचारी कार्यरत आहेत. नेहमी प्रमाणे सोमवारी त्यांनी सेलू बॅंकेच्या शाखेतून सुमारे तीन लाख रूपयांची रोकड घेतली. ते देऊळगाव (गात) ते डासाळा या रस्त्यावर दुचाकीवरून बँकेची रोकड घेऊन जात असतांना त्यांच्या समोरून दोन दुचाकीवर चार चोरटे आले. 

हेही वाचा :   ‘या’ महाविद्यालयात विद्यार्थी संतापले

नागरिकांत भितीचे वातावरण 
त्यांच्या दुचाकीस धडक दिली. रोखपाल पवन फुलमाळी हे दुचाकी चालवत असल्याने त्यांच्या डोळ्यात मिरचीपुड टाकत मारहाण करण्यात आली. तसेच रोकड घेऊन पाठीमागे बसलेले शाखाधिकारी के. एन. मांडे यांना या चोरट्यांनी दगड, काठ्यांनी मारहाण करित त्यांच्याकडील बँकेची रोकड असलेल्या सुमारे दोन लाख रुपयांची बॅग चोरट्यांनी लंपास केली. दिवसा ढवळ्या घडलेल्या या घटनेमुळे परिसरातील नागरिकांत भितीचे वातावरण निर्माण झाले आहे. घटनास्थळी पोलिसांनी भेट देत घटनेची पाहणी केली. त्या दोन्ही बॅक कर्मचाऱ्यावर येथील उपजिल्हा रूग्नालयात उपचार सुरू आहेत. चोरट्यांविरोधात गुन्हा नोंद करण्याची प्रक्रिया सेलू पोलिस ठाण्यात सुरू आहे.

बॅंकेची सुरक्षा वाऱ्यावर...
परभणी जिल्हा मध्यवर्ती बॅंकेच्या सेलू तालुक्यात अनेक शाखा आहेत. परभणी जिल्हा मध्यवर्ती बॅंकेतून चारचाकी वाहणातून केवळ सेलू तालुका शाखेत रोकड काळजी पूर्वक पाठविली जाते. मात्र, तालुका शाखेतून ग्रामीण भागात असलेल्या शाखेत रोकड नेण्याची जबाबदारी तेथील कर्मचाऱ्यांवर टाकली जाते.`ते कर्मचारी या जोखमीची जबाबदारी जीव मुठित धरून करतात. या प्रकारामुळे कर्मचाऱ्यांच्या जिवीतास धोका निर्माण झाल्याचे स्पष्ट झाले आहे.

हेही वाचा :   तामशाच्या ‘गोदावरी’ची अशीही शेती : कशी ते वाचा