मंगरूळ (जि. उस्मानाबाद) - यंदाच्या अत्यल्प पावसामुळे गावागावात पाणीटंचाई निर्माण होत आहे. मंगळूरमध्येही याच परिस्थितीशी महिला दोन हात करत आल्या. गावातील पाणीटंचाईवर मात करण्यासाठी महिलांनी एकत्र येत 25 हजार रुपयांची वर्गणी गोळा केली. त्यातून कूपनलिका खोदली. या कूपनलिकेला बऱ्यापैकी पाणी लागल्याने काहीअंशी तरी पाणीटंचाईवर मात करणे शक्‍य झाले आहे. 

गावाला नळाद्वारे पाणीपुरवठा होणाऱ्या सार्वजनिक विहिरीने तळ गाठला आहे. प्रत्येक घराच्या वाट्याला येणारे पाणी कमी आहे. नोव्हेंबर महिन्यातच ही स्थिती असल्याने पुढील चार महिने कसे घालवायचे, असा प्रश्न महिलांना पडला. त्यामुळे महिलांनी पुढाकार घेऊन प्रत्येकी एक हजार रुपयांप्रमाणे एका तासात 25 हजार रुपये वर्गणी जमा केली. त्यातून महावीर चौकात कूपनलिका खोदली. कूपनलिकेला पाणी लागल्याने सुमित्रा गायकवाड, राणी माळी, शामल जाधव, शोभा तौर, पुष्पा बागरेचा, हाशीना पठाण आदी महिलांच्या चेहऱ्यावरचा आनंद द्विगुणित झाला. उसनवारीने कूपनलिकेसाठी वीजपंप खरेदी करण्यात आला. गावात या महिलांचे कौतुक होत आहे.