जालना - भारतीय सैन्य दलात नायक पदावर कार्यरत असलेले मांडवा (ता. जालना) गावचे भूमिपुत्र गजानन बबनराव मिसाळ यांनी बुलेटच्या मागील बाजूस हात सोडून बसत दोन तास २७ मिनिटे ५४ सेकंद या वेळेत तब्बल १११ किलोमीटरचा प्रवास करून नवीन विक्रम नोंदवला आहे. या यशाबद्दल जालन्याचे आमदार कैलास गोरंट्याल यांनी रविवारी (ता.पाच) त्यांचा सत्कार करून रोख ११ हजार रुपयांचे बक्षीस दिले.

गजानन मिसाळ हे मध्यप्रदेश राज्यातील जबलपूर येथे भारतीय सैन्य दलात नायक पदावर कार्यरत आहे. सैन्य दलाच्या राष्ट्रीय पातळीवर असलेल्या डेअर डेविल्स मोटार सायकल संघाचे ते प्रतिभावान खेळाडू आहेत. भारताने १९७१ मध्ये युद्धात विजय मिळवला होता. तेव्हापासून तो दिन भारतीय सैन्य दलातर्फे विजय दिन म्हणून साजरा केला जातो.

या दिनाचे औचित्य साधून भारतीय सैन्य दलातर्फे जबलपूर येथे आयोजित करण्यात आलेल्या एका कार्यक्रमात मांडवा येथील भूमिपुत्र गजानन मिसाळ यांनी आपले दोन्ही हात सोडून बुलेटच्या करिअरवर बसत तब्बल १११ किलोमीटरचे अंतर केवळ दोन तास २७ मिनिटे ५४ सेकंदात पार करत जागतिक अनोखा विक्रम प्रस्थापित केला आहे. या विक्रमाची नोंद गिनीज बुक लिम्का बुक एशिया बुक बेस्ट ऑफ इंडियामध्ये झाली आहे.

श्री. मिसाळ यांना आतापर्यंत २०१६, २०१९ आणि यावर्षी २६ जानेवारी २०२३ रोजी असे तीन वेळा भारताच्या राष्ट्रपतींना सलामी देण्याचा मान मिळाला आहे. या कामगिरीबद्दल जालन्याचे आमदार कैलास गोरंट्याल यांनी त्यांचा निवासस्थानी शाल, श्रीफळ व पुष्पहार देऊन तसेच रोख ११ हजार रुपयांचे बक्षीस देत यथोचित गौरव केला.

यावेळी सुदर्शन उबाळे, अरुण घडलींग, रमेश सीरसाट, ज्ञानेश्वर उबाळे, अभिजित उबाळे आदींची उपस्थिती होती.