केज - एका सतरा वर्षीय तरूणावर टोकदार शस्त्राने गळ्यावर वार केल्याची घटना मंगळवार (ता.२३) रोजी सायंकाळी सात-आठ वाजण्याच्या दरम्यान घडली. या हल्ल्यात जखमी झालेल्या तरूणास उपचारासाठी उपजिल्हा रुग्णालयात दाखल केले असता डॉक्टरांनी वैद्यकीय तपासणी करून मृत्यू झाल्याचे घोषीत केले.

या मृत्यू झालेल्या तरूणाचे नाव गोरख महावीर हजारे (वय-१७) रा. क्रांतीनगर, केज असे आहे. खूनाच्या घटनेने शहरात एकच खळबळ उडाली असून घटनेंतर या खूनाच्या गुन्ह्यात एका तरूणाला पोलीसांनी ताब्यात घेतले.

शहरातील क्रांतीनगर भागातील समाज मंदिर परिसरात दोन तरूणांमध्ये किरकोळ कारणावरून झालेल्या वादातून एका तरूणाने गोरख हजारे या तरूणाच्या गळ्यावर टोकदार शस्त्राने वार केला. या हल्ल्याच्या घटनेनंतर गंभीर जखमी झालेल्या तरूणास घटनास्थळावरून तात्काळ उपजिल्हा रुग्णालयात दाखल केले मात्र वैद्यकीय तपासणी करून मृत्यू झाल्याचे डॉक्टरांनी घोषित केले.

या घटनेची माहिती मिळताच पोलीस निरीक्षक महाजन, पोलीस उपनिरीक्षक राजेश पाटील व कर्मचाऱ्यांनी रूग्णालय व घटनास्थळाला भेट देऊन माहिती घेतली आहे. नातेवाईकांना शांतता राखण्याचे आवाहन केले. संतप्त झालेल्या नातेवाईकांनी हल्लेखोरास अटक केल्याशिवाय मृतदेह ताब्यात घेणार नसल्याचा पवित्रा घेऊन पोलीस ठाण्यातसमोर ठिय्या मांडला होता.

त्यानंतर थोड्याच वेळात या प्रकरणी पोलीसांनी बोबडेवाडी रस्त्यावर सनी शामराव लांडगे या हल्लेखोर तरूणास पोलीसांनी ताब्यात घेऊन त्याच्या विरोधात रात्री उशिरा खूनाचा गुन्हा दाखल केला आहे. घटनेनंतर मयताच्या संतप्त नातेवाईकांना हल्लेखोराचे घर पेटवून दिले होते परंतू नगरपंचायतच्या अग्निशमन दलाच्या वाहनाने आग आटोक्यात आणली आहे.