मुंबई - मुंबई पोलिसांच्या अमली पदार्थ विरोधी पथकाच्या वांद्रे युनिटने मंगळवारी 22 नोव्हेंबर रोजी केलेल्या कारवाईत दोन ड्रग्ज तस्करांना अटक केल्याची माहिती पोलिसांनी दिली आहे. मुंबईच्या जोगेश्वरी परिसरात अमली पदार्थ विरोधी पथकाने कारवाई करत 2 आरोपींना अटक केली असून, तपास अधिकाऱ्यांनी आरोपींकडून 1 किलो चरस अमली पदार्थ जप्त केला आहे. जप्त केलेल्या अमली पदार्थांची आंतरराष्ट्रीय बाजारपेठेत एकूण किंमत 30 लाख रुपये असल्याची माहिती आहे.

मुंबई अँटी नार्कोटिक्स सेलच्या वांद्रे युनिटला गोपनीय सूत्रांकडून अमली पदार्थंच्या तस्करी संदर्भात विषेशाहिती मिळाली होती. त्याप्रमाणे पोलिसांनी जोगेश्वरी येथे सापळा रचला आणि 2 अंमली पदार्थ तस्करांना अटक केली. अंमली पदार्थ विरोधी पथकाने आरोपींविरूद्ध अंमली पदार्थ आणि सायकोट्रॉपिक सबस्टन्स कायद्यांतर्गत गुन्हा दाखल करून या प्रकरणी तपास सुरू केला आहे.