नवी मुंबई : शेजारी राहणाऱ्या सहावर्षीय अल्पवयीन मुलीवर लैंगिक अत्याचार करणाऱ्या कैलाश गायकवाड (२७) या तरुणाला ठाणे येथील जिल्हा व सत्र न्यायाधीश पी. पी. जाधव यांनी १० वर्षे तुरुंगवास व १० हजार रुपये दंडाची शिक्षा ठोठावली. ही घटना मे २०१६ मध्ये तळवळी गाव येथे घडली होती.

पीडित मुलगी व तिच्यावर लैंगिक अत्याचार करणारा आरोपी कैलाश गायकवाड हे तळवली गाव परिसरात राहण्यास होते. मे २०१६ मध्ये पीडित मुलगी ही आपल्या मैत्रीणीसह सायंकाळच्या वेळी मंदिरात नैवेद्य दाखवून घरी परतत असताना, आरोपीने पीडित मुलीला जबरदस्तीने उचलून आपल्या घरात नेऊन तिच्यावर अत्याचार केले होते.

पीडित मुलीच्या आईने केलेल्या तक्रारीवरून रबाळे पोलिसांनी आरोपी गायकवाडवर बलात्कारासह पोक्‍सो कलमान्वये गुन्हा दाखल करून त्याला अटक केली होती. ठाणे येथील सत्र न्यायालयात दोषारोपपत्र दाखल केल्यानंतर सरकारतर्फे अतिरिक्त शासकीय अभियोक्ता अॅड. विवेक कडू यांनी एकूण ६ साक्षीदारांची साक्ष नोंदविली. त्यानुसार न्या. जाधव यांनी आरोपी कैलाश गायकवाड याला दोषी ठरवत १० वर्षे तुरुंगवास तसेच १० हजार रुपये दंडाची शिक्षा ठोठावली.