अलिबाग : नागाव समुद्रकिनारी फिरण्यास आलेल्या पर्यटकाने त्याच ग्रुपमधील एका पर्यटक महिलेवर अत्याचार केला. या प्रकरणी अलिबाग येथील जिल्हा सत्र न्यायालयाने दोषी ठरवून आरोपीला दहा वर्षे सश्रम कारावास तसेच आरोपीला मदत करणाऱ्या दोघांना एक वर्षे सश्रम कारावासाची शिक्षा सुनावली.

श्रवणकुमार शर्मा (३२, सध्या रा. खारघर, नवी मुंबई) असे आरोपीचे नाव असून तो मूळचा राजस्थान येथील रहिवासी आहे. तसेच सुमित चौधरी, रिचा चौधरी अशी आरोपीला मदत करणाऱ्या आरोपींची नावे असून दोघेही खारघर, नवी मुंबई येथील रहिवासी आहेत. हे तिघेही एकाच कंपनीतील असून श्रवणकुमार हा त्यांच्या कंपनीतील बॉस आहे.

पीडित तरुणी ही मूळची राजस्थानमधील आहे. ती महाविद्यालयीन विद्यार्थिनी आहे. शिक्षणासाठी ती नवी मुंबईत सुमित चौधरी (आरोपी क्रमांक दोन) व रिचा चौधरी (आरोपी क्रमांक तीन) यांच्याकडे पेईंग गेस्ट म्हणून राहत होती. २७ ऑगस्ट २०१५ रोजी पीडित तरुणी, दोन आरोपी व त्यांचा कंपनीतील बॉस असे चौघे नागाव येथील नाईक कॉटेजमध्ये वास्तव्यास राहिले.

पहाटे तीन ते चार वाजण्याच्या सुमारास आरोपी श्रवणकुमार शर्मा याने त्या खोलीत घुसून पीडित तरुणीवर अत्याचार केला. त्यानंतर कोणालाही सांगितल्यास ठार मारण्याची धमकी दिली. पीडित तरुणीने अलिबाग पोलिस ठाण्यात तिघांविरोधात तक्रार केल्यानंतर पोलिसांनी गुन्हा दाखल केला.