मुंबई : राष्ट्रवादी काँग्रेसचा सत्ताधारी अजित पवार गट मंत्रिमंडळ विस्ताराबाबत आग्रही असून पुणे, रायगड, कोल्हापूर यासह प्रभावक्षेत्र असलेल्या जिल्ह्यांचे पालकमंत्रिपद बहाल करा, या मागणीसाठी आज पक्षाच्या ज्येष्ठ नेत्यांनी उपमुख्यमंत्री देवेंद्र फडणवीस यांची भेट घेतली. राष्ट्रवादी काँग्रेसच्या वाट्याला आलेले एक कॅबिनेट मंत्रिपद आणि दोन राज्यमंत्रिपदे रिक्त आहेत.

त्यासाठी शपथविधी व्हावा अशीही पक्षाची मागणी आहे. अद्याप भरल्या न गेलेल्या या कॅबिनेट मंत्रिपदावर बड्या नेत्याची वर्णी लागणार असल्याचे समजते. उपमुख्यमंत्री अजित पवार, प्रदेशाध्यक्ष सुनील तटकरे आणि प्रफुल्ल पटेल यांनी उपमुख्यमंत्री देवेंद्र फडणवीस यांच्याशी त्यांच्या ‘सागर’ या निवासस्थानी चर्चा केली.

या वेळी पुणे जिल्ह्याचे पालकमंत्रिपद अजित पवार यांना त्वरित दिले जावे, अशी मागणी करण्यात आल्याची जोरदार चर्चा आहे. भाजपचे ज्येष्ठ नेते चंद्रकांत पाटील यांचाही पुणे जिल्ह्याच्या पालकमंत्रिपदावर दावा आहे.

त्यामुळे हे पद कुणाला मिळणार, गणेशविसर्जनाला मानाच्या गणपतींची आरती कोण करणार, याबद्दल कमालीची उत्सुकता आहे अन् अप्रत्यक्ष कुरघोडीची तयारीही आडून सुरु आहे. राष्ट्रवादी काँग्रेसचा महायुतीत प्रवेश होण्यापूर्वीपासून पालकमंत्रीपदाबद्दल प्रतीक्षा सुरु आहे. फडणवीस पाच-सहा जिल्ह्यांचे पालकमंत्री आहेत.

रायगड जिल्ह्याचे पालकमंत्रिपद आदिती तटकरे यांना द्यावे की मंत्रिपदाच्या प्रतीक्षेतील भारत गोगावले यांच्यासाठी राखीव ठेवावे, याबद्दल वाद आहे. भाजपने त्यांच्या आमदारांना मंत्रिपदाचे स्वप्न न बघता कामाला लागा, असे सांगितले आहे. शिवसेनेच्या शिंदे गटातही अस्वस्थता आहे. या अडचणीतून मार्ग कसा काढायचा हा मुख्यमंत्री शिंदे यांच्यासमोरचा प्रश्न आहे, असे बोलले जाते.