मुंबई : उद्धव ठाकरेंच्या शिवसेनेचे माजी आमदार तुकाराम काते यांनी शनिवारी मुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. त्याचबरोबर मुंबईतील ठाकरे गटाच्या आणि काँग्रेसच्या माजी नगरसेवकांनी देखील शिवसेनेत प्रवेश केला. यामध्ये सिद्धीविनायक मंदिराचे ट्रस्टी भास्कर शेट्टी यांचा देखील समावेश आहे.

शिवसेनेत प्रवेश करणारे काँग्रेसचे माजी नगरसेवक

पुष्पा कोळी, वाजीद कुरेशी, बब्बू खान, गंगा माने, भास्कर शेट्टी, कुणाल माने, ज्योस्ना परमार या काँग्रेसच्या माजी नगरसेवकांनी आज एकनाथ शिंदेंच्या उपस्थितीत शिवसेनेत प्रवेश केला. यामध्ये सिद्धीविनायक मंदिराचे ट्रस्टी भास्कर शेट्टी यांचा देखील समावेश आहे.

शाळेच्या कामासाठी शिवसेनेत - काते

शिवसेना प्रवेशावेळी तुकाराम काते म्हणाले, माझी चेंबूरमध्ये शाळा आहे. जी पडायला आली आहे, या शाळेत चार हजार विद्यार्थी शिक्षण घेत आहेत. मुख्यमंत्र्यांनी या शाळेचं काम करण्याचं आश्वासन दिलं आहे. चेंबूरमधील पांजरापोळ येथील छत्रपती शिवाजी महाराज यांच्या पुतळ्याची उंची वाढवणार आहेत.

दरम्यान, शिवाजी महाराजांच्या पुतळ्यावरुन मेट्रो जात आहे, हे थांबवायसाठी मला उद्धव ठाकरेंना भेटु द्यावं अशी विनंती मी मिलिंद नार्वेकर यांच्याकडं केली तेव्हा मला ते बोलले की तू कोविड टेस्ट करुन ये. यासाठी मी सर्व प्रयत्न केले पण मला ठाकरेंची भेट काही मिळाली नाही. पण आता एकनाथ शिंदेंच्या शिवसेनेत मी आधीसारखं काम करु शकेल, अशी आशाही यावेळी काते यांनी व्यक्त केली.

निधी मिळत नव्हता - नगरसेवक

तर विकासकामांसाठी आम्हांला निधी मिळत नव्हते, आमची कामं होत नव्हती. आम्हांला कोणी दाद देत नव्हतं म्हणून आम्ही विचार केला की, शिवसेनेत जायला हवं. याविरोधात आमच्यावर दबाव आला पण आम्ही कोणाला जुमानले नाही, अशी प्रतिक्रिया पुष्का कोळी यांनी दिली.