मुंबई : पश्चिम बंगालच्या मुख्यमंत्री व तृणमूल काँग्रेसच्या सर्वेसर्वा ममता बॅनर्जी यांच्या ‘यूपीए’संबंधित विधानावर काँग्रेसने तीव्र प्रतिक्रिया व्यक्त केली आहे. व्यक्तिगत अंहकाराने भाजपचा पाडाव करता येणार नाही असे प्रदेशाध्यक्ष नाना पटोले यांनी नमूद केले. तर गांधी परिवाराला काही शिकविण्याबाबत माजी मुख्यमंत्री अशोक चव्हाण यांनी नाराजी व्यक्त केली. विरोधी ऐक्याला सुरुंग लावण्याचा प्रयत्न यशस्वी होवू देवू नका अशी अपेक्षाही करण्यात आली.

‘‘भारतीय जनता पक्ष हा देशाची घटना आणि लोकशाहीसाठी धोका आहे. भाजपच्या हुकूमशाही वृत्तीविरोधात काँग्रेस अध्यक्षा सोनिया गांधी आणि राहुल गांधी यांच्या नेतृत्वाखाली काँग्रेस पक्ष सातत्याने लढत आहे. हे देशातील जनता पाहत आहे. वैयक्तिक महात्त्वाकांक्षेपेक्षा देश महत्त्वाचा असून भाजपविरोधातील लढाई अहंकाराने नाही तर, एकजुटीने लढण्याची आवश्यकता आहे,’’ असे प्रदेश काँग्रेस समितीचे अध्यक्ष नाना पटोले यांनी म्हटले आहे.

मुंबई दौऱ्यावर आलेल्या पश्चिम बंगालच्या मुख्यमंत्री ममता बॅनर्जी यांच्या वक्तव्यावर प्रतिक्रिया देताना पटोले म्हणाले, ‘‘सत्ता, पैसा आणि स्वायत्त संस्थांचा गैरवापर करून भारतीय जनता पक्षाने देशाच्या लोकशाही आणि घटनेला संपविण्याचे प्रयत्न चालवले आहेत. भाजपच्या या हुकूमशाही वृत्तीविरोधात काँग्रेस पक्ष सातत्याने लढत आहे. राहुल गांधी हे मोदी आणि भाजपविरोधात ठामपणे उभे राहिले. भूसंपादन कायद्यातील बदल आणि तीन कृषी कायद्यांच्या मुद्द्यावर शेतकऱ्यांच्या पाठीशी खंबीरपणे उभे राहून राहुल गांधी हे मोदी सरकारविरोधात लढले.’’

‘‘भाजपची विभाजनवादी नीती, महागाई, बेरोजगारी, शेतकरीविरोधी धोरणे, सर्वसामान्यांचे प्रश्न यावर सातत्याने काँग्रेसनेच लढा दिला आहे. परिस्थितीचे गांभीर्य लक्षात घेऊन व्यक्तीगत महत्त्वाकांक्षेला बाजूला ठेवून राष्ट्रहितासाठी, लोकशाही व संविधान वाचविण्यासाठी सर्व समविचारी राजकीय पक्षांनी एकत्रित येऊन लढा देण्याची वेळ आली आहे. एका राज्यापुरता मर्यादित राजकीय पक्ष भाजपला पर्याय ठरू शकत नाही. काँग्रेस हाच भाजपला सक्षम राजकीय पर्याय आहे,’’ असेही पटोले म्हणाले.

‘‘मागील सात वर्षे केंद्र सरकार विरोधकांवर ‘फोडा आणि झोडा’चा प्रयोग करते आहे. देशभरातील बिगरभाजप पक्षांनी केंद्राच्या त्या प्रयोगाला बळ देणारे राजकारण करू नये, अशी अपेक्षा आहे. देशाच्या व्यापक हिताला ते पोषक नाही,’’ असेही ते म्हणाले.