अलिबाग : भावी पोलिसांकडून वैद्यकीय प्रमाणपत्रासाठी खंडणीची मागणी करणे जिल्हा रुग्णालयातील कर्मचाऱ्याला चांगलेच महागात पडले आहे. याप्रकरणी गुन्हा दाखल झाला अलिबाग पोलिसांनी ताब्यात घेतले आहे.

पोलिस भरतीची अंतिम प्रक्रिया गेल्या काही दिवसांपासून सुरू असून त्यात निवड झालेल्या उमेदवारांची वैद्यकीय तपासणी दहा मेपासून सुरू झाली आहे. अलिबाग येथील जिल्हा रुग्णालयात ही वैद्यकीय तपासणी केली जाते, मात्र कोविड १९ प्रतिबंधात्मक लसीचा डोस घेतल्याचे प्रमाणपत्र नसल्याने अंतिम वैद्यकीय प्रमाणपत्र दिले जाणार नाही, अशी धमकी देण्यात आली. वैद्यकीय प्रमाणपत्राविना अपात्र ठरण्याची भीती महिला उमेदवारांमध्ये निर्माण झाली आहे.

जिल्हा रुग्णालयातील वॉर्ड बॉयच्या मदतीने कर्मचारी प्रदीप ढोबाळ याने अंतिम वैद्यकीय प्रमाणपत्रासाठी १५ उमेदवाराकडून २१ हजार पाचशे रुपयांची खंडणी वसूल केली. ही बाब पोलिस अधीक्षक सोमनाथ घार्गे यांच्या लक्षात आली. त्यांनी याबाबत महिला उमेदवारांशी संपर्क साधून संबंधित घटनेची पडताळणी केली. याप्रकरणी सोमवारी रात्री उशिरा अलिबाग पोलिस ठाण्यात गुन्हा दाखल करण्यात आला असून सहायक निरीक्षक दत्तात्रेय जाधव अधिक तपास करीत आहेत.

जिल्हा रुग्णालयात भ्रष्टाचार फोफावत असल्याचा प्रकार यानिमित्ताने समोर आला आहे. यापूर्वी जिल्हा रुग्णालयातील व अन्य रुग्णालयातील परिचारिकांना सेवेत कायम करण्यासाठी रुग्णालयातील पवार नामक ब्रदर्सने लाखो रुपयांची लाच घेतल्याचा प्रकार उघड झाला होता. तसेच शासकीय वैद्यकीय विद्यालयात भरती करण्यासाठी लाखोंची मागणी केल्याप्रकरणी गुन्हा दाखल झाला आहे.

पोलिस भरतीमध्ये २७८ उमेदवारांची निवड झाली आहे. या उमेदवारांची वैद्यकीय तपासणी सहा दिवसांपासून जिल्हा रुग्णालयात सुरू आहे. १४ महिला उमेदवारांकडून अंतिम वैद्यकीय प्रमाणपत्रासाठी खंडणी मागणाऱ्या कर्मचाऱ्याविरोधात गुन्हा दाखल करून त्याला ताब्यात घेतले आहे.

- सोमनाथ घार्गे, पोलिस अधीक्षक, रायगड