पालघर - तालुक्यातील टेंभी खोडावे-सफाळे बसला बुधवारी (ता.1) सकाळी आठच्या सुमारास मांजुर्ली येथे भीषण अपघात झाला असून, बस मधील अकरा प्रवाशी जखमी झाले आहेत. त्यांना सफाळे येथील प्राथमिक आरोग्य केंद्रात दाखल करण्यात आले आहे. 

टेंभीखोडावे येथून सकाळी साडेसात वाजता सुटलेल्या टेंभीखोडावे- सफाळे बस क्रमांक MH20 D9707 या बसचे चालक सुदर्शन भातुकले यांनी समोरून येणाऱ्या वाहनाला साईट देताना बस घसरून रस्त्याच्या बाजुला पलटी झाली. विशेष म्हणजे या बसमध्ये 90 प्रवाशी होते. सुदैवाने रस्त्याच्या बाजुला असलेल्या झाडांमुळे बस बाजुला असलेल्या नाळयात न जाता अडकली. बसमध्ये अडकलेल्या प्रवाशांना बसच्या पुढील काचा फोडून बाहेर काढण्यात आले. 

बसमधील प्रतिभा हाडळ (टेंभीखोडावे), अंकुश भोईर (जलसार) यांच्या सह अकरा प्रवाशांना डोकीला, हाताला किरकोळ मार लागला असून, त्यांना तातडीने सफाळे येथील प्राथमिक आरोग्य केंद्रात दाखल करण्यात आले आहे.