मुंबई : जुहूमधील (Juhu, Mumbai) पंचतारांकित हॉटेलमध्ये 75 वर्षीय व्यावसायिकानं एका 35 वर्षीय लेखिकेवर बलात्कार केल्याची घटना समोर आलीय. या प्रकरणी व्यावसायिकावर अंबोली पोलिस ठाण्यात (Amboli Police Station) महिलेनं दिलेल्या तक्रारीनुसार, शुक्रवारी पोलिसांनी ३७६(२) एन, ५०४ भादवि कलमांतर्गत गुन्हा दाखल करण्यात आलाय.

विशेष म्हणजे, व्यापाऱ्यानं महिलेला याची वाश्चता कुठंही न करण्यासाठी 'डी कंपनी'ची धमकी दिल्यानं पोलिस कामाला लागले आहेत. 1993 च्या मुंबईसाखळी स्फोटाचा मुख्य सूत्रधार कुख्यात गुंड दाऊद इब्राहिम (Dawood Ibrahim) याचं नाव समोर येताच हत्या, खंडणी, धमकी, जिवे मारण्याचा प्रयत्न या सारख्या गंभीर गुन्ह्यांचा पाडाच वाचला जातो. मात्र, बलात्काराच्या एका गुन्ह्यात चक्क दाऊदच्या नावानं धमकवण्यात आल्याचा प्रकार समोर आलाय.

अंबोली पोलिस ठाण्यात एका 35 वर्षीय लेखिकेनं दिलेल्या तक्रारीनुसार, दादरमध्ये राहणाऱ्या एका ७५ वर्षीय व्यावसायिकानं तिच्यावर अंधेरीच्या जेबीनगर येथील सन अॅण्ड शील (आताचे नाव द ऑन टाईम हॉटेल) इथं मे महिन्यात वेळोवेळी अत्याचार केले आहेत. याच दरम्यान व्यावसायिकानं तिच्याकडून 2 कोटी व्याजानं घेऊन ते परत न केल्याचाही दावा केलाय. या पैशासाठी, त्याच बरोबर महिलेवर केलेल्या अत्याचारबाबत महिलेनं आवाज उठवण्याचा प्रयत्न केला असता, व्यावसायिकानं महिलेला थेट कुख्यात गुंड दाऊद इब्राहिमच्या नावानं धमकावलंय. या प्रकरणी अंबोली पोलिसांनी गुन्हा दाखल करून हा गुन्हा पुढील तपासासाठी अंधेरी एमआयडीसी पोलिसांकडं (MIDC Police) वर्ग केलाय.