मुंबई, ता. ३० : सद्यःस्थितीत लोकसभा सार्वत्रिक निवडणूक २०२४ अंतर्गत महाराष्ट्रातील सर्व टप्प्यांतील मतदान प्रक्रिया पूर्ण झालेली आहे. आदर्श आचारसंहिता अद्यापपर्यंत सुरू असून त्यात कोणतीही शिथिलता आणण्यात आलेली नाही. निवडणुकीचा निकाल जाहीर झाल्यानंतर नवीन लोकसभा स्थापित झाल्याची अधिसूचना आयोगाकडून प्रसिद्ध होईपर्यंत आचारसंहिता कायम राहणार असल्याचे मुख्य निवडणूक अधिकारी कार्यालयाने कळविले आहे.
आचारसंहिता कालावधीत एखाद्या अत्यंत तातडीच्या प्रकरणी आचारसंहितेतून सूट देऊन कार्यवाही करणे आवश्यक आहे, अशी प्रकरणे निवडणूक आयोगास शिफारस करण्यासाठी या कार्यालयाच्या २८ फेब्रुवारी २०२४ च्या परिपत्रकान्वये मुख्य सचिव यांच्या अध्यक्षतेखाली छाननी समिती स्थापन करण्यात आली आहे. या समितीने शिफारस केलेले प्रस्ताव या कार्यालयामार्फत भारत निवडणूक आयोगाच्या मान्यतेसाठी सादर करण्यात येतात. लोकसभा निवडणूक २०२४ च्या अनुषंगाने आचारसंहिता लागू झाल्यापासून आतापर्यंतच्या कालावधीत अशा एकूण ५९ प्रस्तावांवर भारत निवडणूक आयोगाने निर्णय दिला आहे. आचारसंहिता कालावधीत आचारसंहितेचे कटाक्षाने पालन केले जाईल, याची सर्व संबंधितांद्वारे दक्षता घेण्यात यावी. भारत निवडणूक आयोगाने १६ मार्च २०२४ च्या प्रसिद्धीपत्रकानुसार देशात लोकसभा सार्वत्रिक निवडणूक २०२४ चा कार्यक्रम घोषित करून आदर्श आचारसंहिता लागू केलेली आहे.
----
नाशिक, कोकण विभागात विधान परिषद निवडणुकीची आचारसंहिता
नाशिक व कोकण विभागातील महाराष्ट्र विधान परिषदेवरील दोन पदवीधर आणि दोन शिक्षक मतदारसंघांच्या सदस्यांचा कार्यकाळ पूर्ण होत आहे. या रिक्त होणाऱ्या पदांसाठी भारत निवडणूक आयोगाने २४ मे २०२४ रोजीच्या प्रसिद्धीपत्रकान्वये निवडणूक कार्यक्रम घोषित केला आहे. त्याच्या दिनांकापासून संबंधित मतदारसंघात आदर्श आचारसंहिता लागू झालेली आहे.