विरार : केंन्द्रीय मंत्री नारायण राणे ( narayan rane) यांनी राज्याचे मुख्यमंत्री उद्धव ठाकरे (uddhav thackeray) यांच्या विरोधात बदनामीकारक आणि समजात द्वेष भावना भडकवणारी विधाने केल्या प्रकरणी आज सकाळी वसई तालुक्यातील माणिकपूर, नालासोपारा आणि तुळींज पोलीस ठाण्यात त्यांच्या विरोधात शिवसेनेने तक्रारी दाखल केल्या असून येथील वातावरण तापले आहे.

केंद्रीय मंत्री नारायण राणे यांनी काल रायगड येथे बोलताना राज्याचे मुख्यमंत्री उद्धव ठाकरे यांच्या विरोधात अपमानकारक, आपत्तीजन्य आणि समाजात तेढ निर्माण करणारे शब्द वापरून राज्याचा अपमान केला आहे. त्यांनी वापरलेले शब्द हे गुन्ह्याच्या स्वरूपाचे असल्याने त्यांच्यावर तात्काळ गुन्हा दाखल करण्याची मागणी तक्रारीत करण्यात आली आहे. या तक्रारींवर माजी जिल्हाप्रमुख शिरीष चव्हाण, तालुका प्रमुख निलेश तेंडोलकर,विधानसभा संघटक विनायक निकम, सौ किरण चेन्दवणकर, उपजिल्हा प्रमुख नवीन दुबे,पंकज देशमुख,राजाराम बाबर ,प्रथमेश राऊत यांच्या सह्या असून वसई तालुक्यातील शिवसेना याबाबत एकत्र आल्याचे चित्र याठिकाणी दिसत आहे.